کۆمەڵە بە فەرمی ناسنامە و ناوی ئەو ٩ پێشمەرگەیەی بڵاوکردەوە کە بەرەبەیانی ئەمڕۆ لە ئەنجامی هێرشە مووشەکی و درۆنییەکەی کۆماری ئیسلامیی ئێران بۆ سەر بارەگاکانیان لە ناوچەی زڕگوێزی سەر بە پارێزگای سلێمانی، گیانیان لەدەستدا.
بەگوێرەی راگەیەندراوی فەرمیی مەڵبەندی رێکخستنی کۆمەڵە، هێرشەکە لە رێگەی چەندین مووشەک و درۆنی خۆکوژەوە ئەنجامدراوە، کە لە ئەنجامدا جگە لە ٩ گیانلەدەستدان ئاماژە بەوە کراوە کە ژمارەیەک پێشمەرگەی دیکەش بریندارن و لەژێر چاودێریی پزیشکیدان.
ئەم هێرشە توندەی کۆماری ئیسلامیی ئێران لە کاتێکدایە کە لە چوارچێوەی رێککەوتنامەی ئەمنیی نێوان بەغدا و تاران، پێشتر لایەنەکانی رۆژهەڵاتی کوردستان لە ناوچە سنوورییەکانەوە پاشەکشەیان پێکرابوو بۆ ناو کەمپەکانی نیشتەجێبوون لە زڕگوێز و ناوچەکانی دیکەی سلێمانی.
هێرشەکەی ئەمڕۆ شەپۆلێکی سەرکۆنەکردنی توندی لایەنە سیاسییەکان و چالاکوانانی لە هەرێمی کوردستان لێکەوتووەتەوە.
