لەبارەی ئاگربەستی نێوان ئەمریکا و ئێران، وەزیری جەنگی ئەمریکا ڕایگەیاند، نابێت ئێران خاوەن چەکی ئەتۆمی بێت، دەشڵێت، ئەمڕۆ ڕۆژێکی گەورە و گرنگە بۆ ئاشتی لە جیهاندا.
پێت هێگسێس، وەزیری جەنگیی ئەمریکا لە کۆنفڕانسێکی ڕۆژنامەنووسیدا گوتی، سەرکەوتنێکی گەورەمان بەدەستهێناوە و ئێران بە تەواوی شکستی هێناوە و بەشێک لە سەرکردەکانیشیان لە ناوبران.
ئاماژەی بەوەشکرد، ئێران سەکۆ موشەکییەکانی تێکشکێندراوە و جارێکی دیکە ناتوانێت موشەک و سەکۆ موشەکییەکانی بونیاد بنێتەوە، گوتیشی، تەنیا کەمتر لە 10%ـی سوپای وڵاتەکەی تواناکانی خۆی لە جەنگی دژ بە ئێران بەکارهێناوە.
دەربارەی بوونی چەکی ئەتۆمیش ئاشکرایکرد، نابێت ئێران خاوەن چەکی ئەتۆمیی بێت و ترەمپ، ئەم بابەتەی یەکلا کردووەتەوە.
جەختی لەوەشکردەوە، ژێرخانی سەربازیی ئێرانیان بە تەواوی تێکشکاندووە و ئێران هێزی دەریایی نەماوە.
هەر لە کۆنفرانسەکەدا، جەنەراڵ دان کەین، سوپا سالاری ئەمریكا ڕایگەیاند، پێشوازی لە ئاگربەست دەکەن، تاوەکو دوو هەفتەی داهاتووش چاودێریی دۆخەکە دەکەن و توانیوویانە لە 80%ـی توانای سەربازیی ئێران لە ناو بەرن و لە جەنگەکەشدا 13 سەربازیان کوژراوە.