نهێنییەکانی ژیانی ئەو کەسەی دەچێتە سەر کورسییەکەی عەلی خامنەیی

کوڕی دووەمی عەلی خامنەیی، ڕێبەری کوژراوی ئێرانە، یەکێکە لە کاریگەرترین و نهێنیترین کەسایەتییەکانی ناو هەڕەمی دەسەڵات لە تاران.

موجتەبا خامنەیی، ساڵی 1969 لە مەشهەد لەدایکبووە، خوێندنی ئایینی لە قوم تەواو کردووە. ساڵی 2005 و لە کاتی هەڵبژاردنەکانی سەرۆککۆمارییدا، ناوی وەک یاریزانێکی سەرەکی، لە پشت پەردەی سیاسیی ئێران دەرکەوت.

بەوە ناسراوە، پەیوەندییەکی توندوتۆڵی لەگەڵ دەزگا ئەمنییەکان و سوپای پاسداران هەیە، پێگەی بەهێزیی لەنێو "بیت ڕێبەریی"، وایکردووە ڕۆڵی لەناو حکومەت، لە زۆرێک لە وەزیر و بەرپرسە فەرمییەکان، بەهێزتر بێت.

لایەنگرانی موجتەبا خامنەیی، زیاتر لە نەوەی نوێی فەرماندە سەربازییەکان، هێزە ئەمنییەکان و لایەنە توندڕەوە ئوسوڵگەراکان پێکهاتووە، کە لە دوای باوکی، ناوبراو وەک گرەنتییەک، بۆ بەردەوامیی بنەماکانی شۆڕشی ئیسلامی و پاراستنی حکومەت، دەبینن.

دەنگۆی جێگرەوەبوونی موجتەبا، بۆ نزیکەی دوو دەیە پێش ئێستا دەگەڕێتەوە، بەڵام لە چەند ساڵی ڕابردوودا و بەتایبەت دوای تێکچوونی دۆخی تەندروستیی عەلی خامنەیی، ئەم پرسە بووە رۆژەڤ، لە نێوخۆی ئێران و ناوەندە سیاسییە نێودەوڵەتییەکان.

ئەمریکا، لە ساڵی 2019ـەوە موجتەبا خامنەیی خستووەتە لیستی سزاکانییەوە. واشنتن پێیوایە، موجتەبا نوێنەرایەتی ڕەوتی توندڕەوی حکومەت دەکات و دەستێکی باڵای لە سەرکوتکردنی ناڕەزایەتییە ناوخۆییەکان و داڕشتنی سیاسەتە شەڕانگێزەکان لە ناوچەکەدا هەیە.

دوای کوژرانی عەلی خامنەیی، لە ئێستادا وەرگرتنی پۆستی ڕێبەری لەلایەن موجتەبا خامنەییەوە ئەگەرێکی بەهێزە و وەک بژاردەی سوپای پاسداران و باڵی توندڕەو بۆ ئەم پۆستە، باسی لێدەکرێت.

لەبەرانبەردا ئەمریکا و ئیسراییل، هەڕەشەی کوشتنی موجتەبا خامنەیی دەکەن و رایانگەیاندووە، رێگەنادەن جیگرەوە بۆ خامنەیی دەستنیشان بکرێت و هەر کەسێک بکرێتە جێگرەوە دەیکوژن.