کۆمەڵەی مانگی سوری ئێرانی ئاماری زیانە مەدەنییەکانی جەنگی بڵاوکردەوە و دەڵێت، تاران زۆرترین ڕێژەی زیانەکانی بەرکەوتووە.
کۆمەڵەی مانگی سوری ئێرانی لە ڕاگەیەنراوێکدا ئاماری زیانە مەدەنییەکانی جەنگی بڵاوکردەوە و ڕایگەیاندووە، لە سەرەتای هێرشەکانەوە تاوەکو ئێستا، 115 هەزار و 193 یەکەی مەدەنی زیانیان پێگەیشتووە یان بە تەواوی خاپوور بوون.
ئاماژەی بەوەشکردووە، لە کۆی گشتی یەکە زیانلێکەوتووەکان، 91 هەزار و 498 یەکەیان نیشتەجێبوون و 22 هەزار و 580 یەکەیان بازرگانین. ئاشکرایکردووە، 44 هەزار و 391 یەکەی بەرکەوتوویان لە تارانە.
باسی لەوەشکردووە، لە هێرشەکاندا 316 ناوەندی تەندروستی و 763 قوتابخانە و 18 بنکەی فریاگوزاریی خێرا بۆردومان کراون.
کۆمەڵەکە دەشڵێت، تیمەکانی مانگی سور توانیویانە هەزار 526 کەس لەژێر داروپەردووی بینا و خانووە ڕووخاوەکان دەربهێنن، کە 810 کەسیان بە زیندوویی ڕزگارکراون.