وەزارەتی تەندروستیی لوبنان ڕایگەیاند، بەهۆی هێرشەکانی ئیسرائیلەوە لە ماوەی 40 ڕۆژی ڕابردوودا نزیکەی نۆ هەزار کەس لە لوبنان بوونەتە قوربانیی.
وەزارەتی تەندروستیی لوبنان ئاماری نوێی قوربانییانی بڵاوکردەوە و دەڵێت، ژمارەی قوربانییەکان لە 2ـی ئازاری 2026 و لەگەڵ دەستپێکردنی هێرشی ئەمریکا و ئیسرائیل بۆ سەر ئێران تاوەکو ئەمڕۆ گەیشتووەتە هەشت هەزار و 640 کەس.
بەگوێرەی ئەو ئامارانەی تەندروستیی لوبنان بڵاویکردوونەتەوە، تەنیا لە ماوەی 40 ڕۆژی ڕابردوودا دوو هەزار و 55 کەس لە ناوچە جیاوازەکانی وڵاتەکە کوژراون و شەش هەزار و 588 کەسیش برینداربوون.
ئەوە لە کاتێکدایە سەرباری ئاگربەستی دوو هەفتەی لە نێوان ئەمریکا و ئیسرائیل و ئێران، هێرشکردنە سەر لوبنان لەلایەن ئیسرائیلەوە بەردوامە و لە چەند ڕۆژی ڕابردووشدا ئیسرائیل ڕایگەیاند، کە چڕترین و گەورەترین هێرشیان کردووەتە سەر لوبنان، کە لە کەمتر لە 10 خولەکدا زیاتر لە 250 کەس کوژران.