بەگوێرەی راپۆرتێکی ئاژانسی "کوردپا" بۆ هەواڵە ئابووری و کۆمەڵایەتییەکانی ڕۆژهەڵاتی کوردستان، شاری سەقز ڕووبەڕووی شەپۆلێکی بێپێشینەی قەیرانی دارایی بووەتەوە و بەهۆی کەمیی نەختینە، پەککەوتنی گشتگیری سیستەمی بانکی و بەرزبوونەوەی نرخی کەرەستە خاوەکان، زۆرینەی ناوەندەکانی بەرهەمهێنان و یەکە پیشەسازییەکانی ئەو شارە ناچار بوون دەرگاکانیان دابخەن یان کارەکانیان ڕابگرن.
ئەم پەککەوتنە لە کاتێکدایە کە بازاڕی شارەکە لەژێر گوشارێکی تاقەتپڕوکێنی گرانییەدایە و تەنیا لە ماوەی 14 ڕۆژی ڕابردوودا نرخی پێداویستییە سەرەکییەکانی وەک خۆراک و کەرەستەی خاو بە رێژەی دوو بۆ سێ هێندە بەرز بووەتەوە.
ئەمەش وایکردووە توانای کڕینی هاونیشتمانیان بۆ نزمترین ئاست دابەزێت و بژێویی خێزانەکان بکەوێتە مەترسییەکی جیدییەوە.
هاوکات، داخرانی کارگە و یەکە بەرهەمهێنەرەکان بووەتە هۆی دروستبوونی شەپۆلێکی گەورەی بێکاری لە ناوچەکەدا، کە ئەمەش نائومێدییەکی قووڵی لەنێو گەنجان، کاسبکاران و خاوەنکارەکاندا دروست کردووە، چونکە خێرایی گۆڕانی نرخەکان و تێچووی بەرهەمهێنان بە جۆرێکە کە چیتر کەرتی تایبەت توانای بەرگەی گرتنی ئەو زیانە داراییە گەورانەی نەماوە.
تاوەکو ئێستاش لایەنە پەیوەندیدارەکان هیچ هەنگاوێکی کردەیی یان پلانێکی روونیان بۆ رزگارکردنی کەرتی پیشەسازی و کۆنتڕۆڵکردنی بازاڕ لەو شارەدا نەخستووەتە ڕوو.