فوئاد حوسێن، وەزیری دەرەوەی عێراق لە لێدوانێکدا بۆ میدیای فەرمیی پارتەکەی (پارتی دیموکراتی کوردستان) تیشکی خستە سەر ئایندەی سیاسیی عێراق و ڕایگەیاند، هەموان پێکەوە کار دەکەن بۆ ئەوەی حکومەتی نوێی عێراق بە سەرۆکایەتیی عەلی زەیدی سەرکەوتوو بێت و لە خزمه‌تی خەڵکی وڵاتەکەدا بێت.
هیواشی خواست کە کێشە هەڵپەسێردراوەکانی نێوان هەرێمی کوردستان و بەغدا بە تەواوی چاک ببنەوە و چارەسەرێکی ڕیشەیییان بۆ بدۆزرێتەوە.
وەزیری دەرەوەی عێراق ئاماژەی بەوەشدا، هەموو حکومەتێک کار و پلانی جیاوازی هەیە و کابینەی نوێش بە بەرنامەیەکی جیاواز لە پێش خۆی کار دەکات.
جەختیشی کردەوە کە کاری لەپێشینەی وەزارەتەکەی لەم قۆناغەدا، ڕێکخستنەوەی پەیوەندییەکانی عێراق دەبێت لەگەڵ وڵاتانی ناوچەکە و جیهان، کە بەهۆی لێکەوتەکانی جەنگی نێوان ئەمریکا و ئێرانەوە تا ڕادەیەک کاریگەریی خراپیان لەسەر جێهێڵدراوە.
سەبارەت بە گۆڕانکارییە سیاسییەکانی ناوخۆی عێراق، جیابوونەوەی چەند حیزبێک لە هاوپەیمانیی چوارچێوەی هەماهەنگی و دابەشبوونی ماڵی شیعە، هاوکات لەگەڵ بڵاوبوونەوەی دەنگۆی پەیوەندییکردنی پارتی دیموکراتی کوردستان بە بەرەیەکی نوێوە.
فوئاد حوسێن ئاشکرای کرد، حیزبە سیاسییەکان لە ئێستادا خەریکی گفتوگۆ و دروستکردنی هاوپەیمانێتییەکی نوێی سیاسین، بەڵام هێشتا بە تەواوی دیار و یەکلا نەبووەتەوە کە ئایا پارتی دەچێتە ناو ئەو هاوپەیمانییە نوێیەوە یان نا."