دوای 34 ڕۆژ له جه‌نگ و ڕاگرتنی ته‌واوه‌تی گه‌شته ئاسمانییه‌كانی، وەزارەتی گواستنەوە و گەیاندنی عێراق رایگەیاند، حکومەت بیر لە کردنەوەی بەشێکی ئاسمانی وڵات دەکاتەوە.
مەیسەم ئەلسافی بەڕێوەبەری ڕاگەیاندن لە وەزارەتی گواستنەوە و گەیاندنی عێراق ڕایگەیاندووە، بۆ كردنه‌وه‌ی به‌شێكی ئاسمانی وڵات به ڕووی گه‌شته ئاسمانییه‌كان، وەزارەته‌كه‌یان کاردەکات بۆ دەستنیشانکردنی ڕێڕەوی ئاسمانی جێگره و پارێزراوتر ئه‌وه‌ش بە هەماهەنگی لەگەڵ دەزگا نێودەوڵەتییە پەیوەندیدارەکان و بە لەبەرچاوگرتنی درێژەکێشانی گرژییەکان لە ناوچەکەدا.
گوتیشی، بڕیاری داخستنی ئاسمانی عێراق لە ئەنجامی پێشهاتە سەربازییەکانی ناوچەکە و پەرەسەندنی گرژییەکاندا هات، ئەمه‌ش لە پێناو پاراستنی ئاسمانی نیشتمانی و دەستەبەرکردنی سەلامەتی گەشتیاران و هێڵە ئاسمانییەکان.
ئەمەش لە کاتێکدایە، بەهۆی بەردەوامی شەڕی ئەمریکا و ئیسرائیل لەگەڵ ئێران، لە 28ی شوباتی ئه‌مساڵەوە ئاسمانی عێراق بە ڕووی گەشتەکاندا بە داخراوی ماوەتەوە.