حکومەتی عێراق بڕیاریدا لەپێناو بەرژەوەندیی گشتی و دابەزینی نرخەکان، تەواوی باج و گومرگ لەسەر هاوردەکردنی هێلکە و ئاژەڵ لاببات.
نووسینگەی سەرۆکوەزیرانی عێراق ڕایگەیاند، بە فەرمانی عەلی زەیدی، سەرۆکوەزیران، بڕیاری لابردنی باج و گومرگ لەسەر هێلکە و ئاژەڵی هاوردە دراوە و لەمەودوا هیچ باج و گومرگێک لەسەر ئەو دوو بەرهەمە سەرەکییە وەرناگیرێت، ئەوەش بە ئامانجی ئەوەی بە نرخێکی گونجاو بگەنە دەستی هاووڵاتییان.
لەلای خۆیەوە، وەزارەتی بازرگانیی عێراق پێشوازیی لە بڕیارەکە کرد و ڕایگەیاند کە ئەو هەنگاوەی سەرۆکوەزیران کاریگەرییەکی ئەرێنی دەبێت لەسەر دابەزینی نرخی گۆشتی سوور و هێلکە لە بازاڕەکانی عێراق و هەرێمی کوردستاندا، و تاڕادەیەک بارگرانیی سەر شانی هاووڵاتییان سووک دەکات، بەتایبەت کە گۆشت و هێلکە لە پێکهاتەی خۆراکیی هاووڵاتییاندا زۆرترین خواستیان لەسەرە.