بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان ڕایگەیاند کە شەپۆلێکی دیکەی تاوەباران و هەورەبرووسکە زۆربەی ناوچەکانی هەرێمی کوردستان دەگرێتەوە و پێشبینی دەکرێت لە کۆتایی ئەم مانگەشدا بارانی پەڵە بباریت.
بەپێی ڕاگەیەندراوی کەشناسی، تاوەکو ئێوارەی ئەمڕۆ هەینی، تاوەباران و هەورەبرووسکە بە شێوەی پچڕپچڕ زۆربەی ناوچەکان دەگرێتەوە. ئاسمان لە زۆربەی کاتەکاندا نیمچەهەور دەبێت و لە هەندێک شوێن دەگۆڕێت بۆ هەوری تەواو. سەرەڕای ئەوەی کە شەپۆلەکە بە گشتی لاوازە و بڕێکی کەم بارانی پێوەیە، بەڵام لە کاتی هەبوونی خۆردا خێرایی با زیاد دەکات و لە کاتەکانی شەودا کاریگەرییەکەی نامێنێت و کەشوهەوا ئاسایی دەبێتەوە.
پێشبینیی پلەکانی گەرما بۆ ڕۆژی شەممە:
هەولێر: ٣١ پلەی سیلیزی
سلێمانی: ٢٨ بۆ ٣٠ پلەی سیلیزی
دهۆک: ٢٩ پلەی سیلیزی
گەرمیان: ٣٦ بۆ ٣٧ پلەی سیلیزی
حاجی ئۆمەران: ٢١ بۆ ٢٢ پلەی سیلیزی
جێگەی ئاماژەیە، ڕۆژانی یەکشەممە و دووشەممە کەشوهەوا بە سەقامگیری دەمێنێتەوە، بەڵام لە نێوان ١٢ تاوەکو ١٧ی ئەم مانگەدا دوو شەپۆلی دیکەی بارانبارین ڕوو لە ناوچەکە دەکەن، و چاوەڕوان دەکرێت لە هەفتەی کۆتایی مانگدا بارانی پەڵە بە گشتی سەرجەم ناوچەکانی هەرێمی کوردستان بگرێتەوە.