بەهۆی هاتنەئارای شەپۆلێکی چالاکیی بوومەلەرزەیی لە هەرێمی کوردستان، عێراق و ئێران، تەنیا لە ماوەی چوار ڕۆژی ڕابردوودا ٢٠ بوومەلەرزە پارێزگای کەرکوکیان هەژاندووە، کەشناسیی سلێمانیش دەڵێت ئەم لەرزینانە لە مەودای ئاساییدا و بەڵگە نییە لەسەر ڕوودانی بوومەلەرزەی بەهێز.
بەپێی بەیاننامەیەکی دەستەی کەشناسی و بوومەلەرزەزانیی عێراق، لە ٣٠ی تەممووزەوە تاوەکو ئەمڕۆ کۆی گشتیی بوومەلەرزەکانی کەرکوک گەیشتووەتە ٢٠ بوومەلەرزە کە گوڕەکەیان لە نێوان ٣ بۆ ٣.٩ پلەی ڕێختەردا بووە.
هاوکات لە چەند ڕۆژی ڕابردوودا زنجیرەیەک بوومەلەرزە بە گوڕی ١ تا ٣.٨ پلە لە هەولێر، سلێمانی، هەڵەبجە و ئیدارەی گەرمیان تۆمار کراون، و هەفتەی ڕابردووش ٥ بوومەلەرزە لە پارێزگای کرماشانی ڕۆژهەڵاتی کوردستان ڕوویان داوە.
لای خۆیەوە، بەڕێوەبەرایەتیی کەشناسی و بوومەلەرزەزانیی سلێمانی ڕایگەیاند کە هەرێمی کوردستان نزیکە لە پشتێنەی بوومەلەرزەی زاگرۆس و داتاکان ئاماژە بە چالاکیی هێواش و مامناوەند لە مەودای ئاساییدا دەکەن، جەختیشی کردەوە کە دووبارەبوونەوەی چەند بوومەلەرزەیەک بەدوای یەکدا بەڵگە نییە لەسەر ڕوودانی بوومەلەرزەی مەترسیدار یان بەهێز.