بەڕێوەبەرایەتیی کۆمەڵگەی دەروازەی نێودەوڵەتیی باشماخ ڕایگەیاند، کێشەی سیستمی ئەلیکترۆنی لە مەرزەکە بە تەواوەتی چارەسەر کراوە و هاتوچۆی گەشتیاری و بازرگانی تێیدا ئاسایی بووەتەوە.
بەگوێرەی ڕاگەیێندراوی بەڕێوەبەرایەتیی دەروازەکە، هاتوچۆی گەشتیاران و شۆفێرانی بازرگانی هاوشێوەی ڕۆژانی پێشوو لە کاتژمێر 07:30ی بەیانی بۆ کاتژمێر 09:00ی شەو بەردەوام دەبێت.
ئاماژە بەوەش کراوە کە کێشەی لەکارکەوتنی سیستمەکە لە دیوی کۆماری ئیسلامیی ئێرانەوە بووە و دوای هەوڵەکان ئێستا گرفتەکە نەماوە.
ئەمە لە کاتێکدایە کە لە ماوەی چەند ڕۆژی ڕابردوودا، بەهۆی دروستبوونی کێشەی تەکنیکی لە سیستمی ئەلیکترۆنیی دەروازەکەدا، پرۆسەی هاتوچۆی گەشتیاری و ئاڵوگۆڕی بازرگانی لە نێوان هەرێمی کوردستان و ئێران لەو دەروازەیەوە بە تەواوی ڕاگیرابوو.