ئەمڕۆ حزبی زەحمەتکێشانی کوردستان لە بارەگای فەرمیی خۆی پێشوازی لە شاندێکی باڵای حزبی سۆسیالیست دیموکراتی کوردستان کرد؛
لە کۆبوونەوەکەدا هەردوولا جەختیان لەسەر پێویستیی کۆتایهێنان بە لێکترازان و یەکخستنی گوتاری سیاسیی نێوان لایەنەکان کردەوە.
لە کۆنگرەیەکی ڕۆژنامەوانیی هاوبەشدا لە دوای کۆبوونەوەکە، حزبی زەحمەتکێشان پشتیوانیی تەواوی خۆی بۆ پڕۆژەی پێکهێنانی ئەنجوومەنێکی سیاسی و هەر دەستپێشخەرییەکی دیکە ڕاگەیاند کە ئامانج لێی یەکخستنی گوتاری سیاسیی کوردستانی و کۆتایهێنان بێت بە دووبەرەکیی نێوان هێزە سیاسییەکان.
هەر لەو کۆنگرە ڕۆژنامەوانییەدا ئاماژە بەوە کرا کە لەم قۆناغ و دۆخە هەستیارەدا، هیچ بەدیلێک بۆ یەکڕیزی لە هەرێمی کوردستاندا نییە و کاتی ئەوە هاتووە تەواوی لایەنەکان ناکۆکییەکانیان وەلابنێن و بەرەی پێکهەوەیی بۆ ڕووبەڕووبوونەوەی تەحەددییەکان بەهێز بکەن.