بەڕێوەبەرایەتیی کارەبای سۆران ئاگاداریی دانیشتووانی چەند گەڕەکێکی خەلیفان دەکاتەوە، بەهۆی کارکردن لە پڕۆژەی ڕووناکی، بۆ ماوەی نۆ کاتژمێر کارەبای نیشتمانییان دەبڕێت.
بەڕێوەبەرایەتی گشتیی کارەبای سۆران ئاگادارییەکی لە فەیسبوک بڵاوکردەوە و ڕایگەیاند، لە کاتژمێر 8ـی بەیانییەوە تا کاتژمێر 5ـی ئێوارە هەریەک لە گەڕەکەکانی شۆڕش، زراعە، باویان، خەبات، ڕاپەڕین، جۆلەمێرگی خواروو، سەرچیا و دۆڵی بیاو، لە ناوەندی شارۆچکەی خەلیفان کارەبایان نابێت.
بەڕێوەبەرایەتییەکە لە بارەی هۆکاری نەمانی کارەبا ئاماژەی بەوەداوە، بە هۆی کارکردنی تیمی پڕۆژەی ڕوناکیی لە سنورەکە، کارەبا لەو ماوە دیاریکراوەدا دەبڕێت .
کارکردن بۆ دابینکردنی کارەبای بەردەوام لە ناوچە جیاوازەکانی هەرێمی کوردستان بەردەوامە و لەو چوارچێوەیەشدا بەڕێوبەرایەتی گشتیی کارەبای سۆران ڕایگەیاند، لە ئێستادا کارەبای سۆران بووەتە 24 کاتژمێریی.