بافڵ جەلال تاڵەبانی، سەرۆکی یەکێتیی نیشتمانیی کوردستان، پشتیوانیی خۆی بۆ دەستپێشخەرییەکەی ئەمینداری گشتیی عەسائیب ئەهلی حەق ڕاگەیاند و بە هەنگاوێکی گرنگ لە پێناو بەهێزکردنی قەوارەی دەوڵەتی عێراقدا ناوزەندی کرد.
بافڵ تاڵەبانی لە پەیامێکدا ڕایگەیاند: "زۆر سوپاس و پێزانینم هەیە بۆ ئەو هەڵوێستەی برام شێخ قەیس خەزعەلی لەپێناو پاڵپشتیکردن و بەهێزکردنی قەوارەی دەوڵەتی عێراق و دامەزراوەکانی."
سەرۆکی یەکێتی ئاماژەی بەوەش کردووە، لەم قۆناغە هەستیارەدا، ئەم جۆرە هەڵوێستە بەرپرسیارانە، ئازایانە و نیشتمانپەروەرانەیە دەبنە هۆی بەهێزکردنی یەکڕیزیی نیشتمانی و قووڵکردنەوەی متمانە لەنێوان عێراقییەکاندا.
لە کۆتایی پەیامەکەیدا، تاڵەبانی جەختی کردووەتەوە کە ئەم هەنگاوە دەبێتە پاڵنەرێکی گرنگ بەرەو بەدیهێنانی ئاواتە هاوبەشەکان بۆ دابینکردنی پاشەڕۆژێکی سەقامگیرتر، ئارامتر و گەشەسەندووتر بۆ عێراق.