ئەنجومەنی وەزیرانی هەرێمی کوردستان هەرسێ وەزارەتی داد، دارایی و ئابووری، و پلاندانان ڕادەسپێرێت بۆ بەدواداچوونی یاسایی و دەستووری لەسەر پڕۆژەیاساکانی فیدراڵیی تایبەت بە قەرز و بەخشینەکان، بە مەبەستی دەستەبەرکردنی ماف و شایستە داراییەکانی هەرێم.
بە نووسراوی فەرمیی سەرۆکایەتیی ئەنجومەنی وەزیران، ئەو وەزارەتە ڕاسپێردراون سەرنج و تێبینییە یاسایی و دەستوورییەکانیان لەسەر پڕۆژەیاسا فیدراڵییەکانی تایبەت بە قەرز و بەخشینەکان ئامادە بکەن. لە بڕیارەکەی ئەنجومەنی وەزیراندا جەخت لە جێبەجێکردنی ماددەی (106)ـی دەستووری عێراق کراوەتەوە، کە بەپێی ئەو ماددەیە دەبێت هەرێمی کوردستان بەشی شایستەی خۆی لە هەر قەرز و هاوکارییەکی نێودەوڵەتی وەربگرێت کە حکومەتی فیدراڵی دەستی دەکەوێت.
حکومەتی هەرێمی کوردستان لەسەر ئەو بنەمایە جەخت لەم هەنگاوە دەکاتەوە کە هەرێم بەردەوام بەشدار بووە لە دانەوەی قەرزە نێودەوڵەتییەکان و سوودە کەڵەکەبووەکانیان، و لە کاتی دابەشکردنی هەر قەرز و بەخشینێکدا پێویستە مافە دەستوورییەکانی هەرێم وەک خۆیان ڕەچاو بکرێن، چونکە ئەم پڕۆژەیاسایانە کاریگەریی ڕاستەوخۆیان لەسەر مافە داراییەکانی هەرێم دەبێت.