ئۆجالان: دایکم زریانێکی سەرهەڵدان بوو

ئامادەکردنی/ کوردستان لەزگییەڤا

ماوەی 33 ساڵ بەسەر کۆچی دوایی دایکی عەبدوڵا ئۆجالان، عائیشە ئۆجالان، تێدەپەڕێت، ئۆجالان سەبارەت بە دایکی دەڵێت: "مافی دایکایەتی تەنها لە ڕێگەی خەباتەوە بەدەستدێت، لە بنەڕەتدا مافی دایکایەتی تەنها بەم شێوەیە دەدرێت. دایکم زریانێکی سەرهەڵدان بوو، ملکەچی کەس نەبوو".

 عائیشە دایکی ئۆجالان، خەڵکی گوندی ئەراحە لە ناوچەی خەلفەتی لە ئورفا، ئەو گوندە بە "گوندی کۆمۆنیست" ناودەبرا، باوکی عایشە خەڵکی گوندی ئامارا بوو. عائیشە لە 26ی تشرینی دووەمی 1918 لەدایک بووە.

 بە درێژایی 75 ساڵی ژیانی، هەمیشە یاخی بووە و ملکەچی کەس نەبووە. عایشە هاوسەرگیری لەگەڵ پیاوێکد کردووە، کە لە تەمەنێکی زۆر بچووکدا بوو، هەرگیز نەیناسیبوو. دوای ئەوەی هاوسەرەکەی ژنێکی کوشتووە و دواتر زیندانی کراوە و لە زینداندا گیانی لەدەستداوە، عائیشە گوندەکەی جێهێشتووە و دوای چەند ساڵێک هاوسەرگیری لەگەڵ عومەر ئۆجالان کردووە، کە دەکاتە باوکی ئۆجالان.

 لەم هاوسەرگیرییەدا منداڵەکانی نەڤدە، بیناز، حەوا، عەینێ، فاتمە، عەبدوڵا، محەمەد، عوسمان و عەلی لەدایک بوون. منداڵەکانی نەڤدە و بیناز لە تەمەنی تەنها چەند مانگێکدا گیانیان لەدەستداوە، عەلیش لە تەمەنی 12 ساڵیدا کۆچی دوایی کردووە، خەڵکی تورکیا و باکوری کوردستان دواتر بەهۆی دەرکەوتن و سەرکێشییەکانی ئۆجالانەوە عائیشەیان ناسی و ناویان بیست.

 ئەمڕۆ ماوەی33  ساڵ بەسەر کۆچی دوایی دایکی ئۆجالان، عائیشە تێدەپەڕێت، کە ئۆجالان خۆی بە سەرچاوەی خەباتی ژنان وەسفی دەکات. عایشە کە ئۆجالان بە "گەردەلولی یاخیبوونێکی تەواو، کە کڕنۆشی بۆ کەس نەبوو" وەسفی دەکات، لە 11ی نیسانی 1993 بە نەخۆشی شەکرە کۆچی دوایی کردووە.

ئۆجالان لە هەڵسەنگاندنەکانیدا ئاماژەی بەوەداوە، کە دایکی کاریگەری زۆری لەسەر ژیان و تێکۆشانی هەبووە، دەشڵێت: "پاداشت و مافی دایکایەتی تەنها بە تێکۆشانێکی بێ وێنە دەتوانرێت بدرێتەوە، بۆ دایکێک ماف بەو شێوەیە دەدرێتەوە، ئەی بۆ ژنێک چۆن پەیوەندییەک نیشان بدرێت؟، ئێمە لە ڕێگەی شیکردنەوەی ئازادیی ژنانەوە نیشانمانداوە، دەتوانرێت بەم شێوەیە وەڵامی دایک بدرێتەوە، پێویستی بە پێشکەشکردنی دیارییەکی بچووک نییە، بەڕای من شیکردنەوەی ئازادیی ژن گەورەترین ڕێزە بۆ دایک.

ئۆجالان دایکی خۆی وەک ڕێبەری خۆی دەبینێت و وەک “تێکۆشەرێکی گەورە” پێناسەی دەکات و دەڵێت: "ئەو لە تەمەنێکی بچووکیشدا منی فێری شەڕکردن کرد. هەتا ئێستاش کاریگەری لەسەر من هەیە، دایکم هەستێکی وای لە مندا دروست کرد، تۆ ناتوانی پشت بە من بەستیت، بە هاوکاری من، بە گریان و گلەیی بژیت، دەبێت خۆت وەڵامت هەبێت، بۆ من تۆڵەکردنەوەیەک یان هەستکردن بە دەستکەوت بوو، دایکم بە تەواوی زریانی یاخیبوون بوو، لە گوندەکەدا وەکو ژنێکی یاخی دەناسرا، سەری بۆ هیچ کەسێک دانەدەنواند، بەبێ جیاوازی لێپرسینەوەی لە ژن و پیاو دەکرد".