پارێزگاری هەولێر ڕایگەیاند: فرۆشتنی بەنزین بە جلیکانە لە ناو ئۆتۆمبێل قەدەغەیە و هەرکەس سەرپێچی بکات ڕووبەڕووی ڕێکاری توندی یاسایی دەکرێتەوە.
ئەمڕۆ بە سەرپەرشتی ئومێد خۆشناو پارێزگاری هەولێر و ئامادەبوونی نەبەز عەبدولحەمید، قائیمقامی ناوەندی و ئاری كاكەشین، بەڕێوەبەری نەوت و كانزاكانی هەولێر، كۆبوونەوەیەكی فراوان لەگەڵ ئەنجومەنی بەنزینخانەكان ئەنجامدرا.
تێیدا ئومێد خۆشناو ڕایگەیاند: لە ئەنجامی ڕێكخستن و ڕێگریكردن لە سەرپێچی و زیادەڕەوییەكان توانراوە كۆنتڕۆڵی كۆالێتی بەنزین بۆ ئاستێكی زۆر باش بكرێت.
ئاماژەى بەوەشکرد: بەهەموو شێوەیەك فرۆشتنی بەنزین بە جلیكانە و لەناو ئۆتۆمبێلەكان و لەسەر شەقامەكان ڕێگەپێدراو نییە.
گوتیشى: هۆشداری دەدەین كە هەر لایەن و كەسێك بەبێ مۆڵەت و بەوشێوەیە بەنزین بفرۆشێت، ڕێكاری یاسایی توندی بەرامبەر دەگیرێتەبەر.