وەزارەتی ئەوقاف و کاروباری ئاینیی هەرێمی کوردستان، بڵاوبوونەوەی گرتەیەکی ڤیدیۆیی، کە تێیدا بێڕێزی بە پێکهاتەی ئێزدییان دەکرێت بەتوندی ڕەتدەکاتەوە و دەڵێ، کردارەکە دوورە لە بەها ئاینی و مرۆڤایەتییەکان و لە کاتی پێویستدا داوای یاسایی لەسەر ئەنجامدەری کارەکە تۆمار دەکەن.
نەبەز ئیسماعیل، گوتەبێژی وەزارەتی ئەوقاف و کاروباری ئاینی لە ڕاگەیەندراوێکدا ئاماژەی بەوە کردووە، فەرهەنگی پێکەوەژیان لە هەرێمی کوردستان ڕەگ و بنەچەیەکی مێژوویی هەیە و مامۆستایانی ئاینی پیرۆزی ئیسلام و تەواوی ئاینەکانی دیکە هەمیشە ڕۆڵی ئەرێنییان هەبووە لە پەرەپێدانی گیانی تەبایی و ئاشتیی کۆمەڵایەتیدا.
سەبارەت بەو گرتە ڤیدیۆییەی بڵاوبووەتەوە، نەبەز ئیسماعیل دەڵێ، ڕووداوەکە لە دەرەوەی سنوری هەرێمی کوردستان و عێراق ڕوویداوە، بەڵام بەکارهێنانی وشەی نالۆژیکی بەرانبەر هەر پێکهاتەیەک بەتەواوی ئیدانە دەکەن و ڕەتی دەکەنەوە.
وەزارەتی ئەوقاف جەختی لەسەر بەهێزکردنی پەیوەندیی ئاشتییانە، برایەتی و پێکەوەژیانی هەمەلایەنە لە نێوان تەواوی پێکهاتەکاندا دەکاتەوە و ئاماژەی بەوەکردووە، وەزارەتەکە بە مافی خۆی دەزانێت لە کاتی پێویستدا ڕێکاری یاسایی بگرێتەبەر.
وەزارەتی ئەوقافی هەرێم: سووکایەتیکردن بە ئێزدییەکان بەتووندی ڕەتدەکەینەوە
