ئومێد خۆشناو، پارێزگاری هەولێر ڕایگەیاند، بەهۆی سەرهەڵدانەوەی قەیرانی بەنزین و بەرزبوونەوەی نرخی بەنزینی نۆرماڵ بۆ سەرووی 1700 دینار، بڕیاریان داوە ژمارەی بەنزینخانەکانی بەنزینی پاڵپشتیکراو (750 دیناری) زیاد بکەن و سیستەمی کارتی ئەلیکترۆنیش کارا بکەنەوە.
پارێزگاری هەولێر ئاماژەی بەوە کرد، ژمارەی ئەو بەنزینخانانەی بەنزینی 750 دیناری دابەش دەکەن لە سبەینێوە زیاتر دەکرێن و دەگەیێندرێنە 25 تا 35 بەنزینخانە. جەختیشی لەوە کردەوە، دابەشکردنی بەنزینی پاڵپشتیکراو دووبارە دەبەسترێتەوە بە کارتی وەرگرتنی سووتەمەنی و ئۆتۆمبێلەکان تەنیا بەو کارتە بەنزینیان پێ دەدرێت.
ئومێد خۆشناو ڕاشیگەیاند، لە سبەینێوە پرۆسەکە بە شێوازی تاقیکاری دەست پێدەکات و لە ڕۆژی یەکشەممەوە بە تەواوەتی ڕێکدەخرێت، بە جۆرێک کە هەوڵ دەدرێت ئۆتۆمبێلی تایبەت و تاکسی لە یەکتر جیا بكرێنەوە.
پارێزگاری هەولێر: ژمارەی بەنزینخانەکانی بەنزینی پاڵپشتیکراو دوو هێندە دەکرێن
