قۆناغی یەکەمی یەکخستنی پەروەردە لە حەسەکە سەرکەوتوو بوو

بە مەبەستی ڕێکخستنەوەی کەرتی خوێندن لە ڕ‌ۆژئاوای کوردستان، پڕۆسەی یەکخستنی دامەزراوە پەروەردەییەکان لە پارێزگای حەسەکە دەست پێ کرد و قۆناغی یەکەمی کارەکان بە سەرکەوتوویی کۆتایی هات.

لە چوارچێوەی جێبەجێکردنی ڕێککەوتنی (29) ی کانوونی دووەمی نێوان هێزەکانی سووریای دیموکرات (هەسەدە) و حکوومەتی کاتیی سووریا، هەنگاوە کردەییەکان بۆ یەکخستنی لایەنی کارگێڕی و پڕۆگرامی خوێندن لە ناوچەکە گیرانە بەر.

عەدنان بەری، بەڕێوەبەری پەروەردە و فێرکردن لە حەسەکە، لە بارەی وردەکاریی پڕۆسەکە ڕایگەیاند، میکانیزمی یەکخستنەکە لە سەر دوو تەوەرەی سەرەکی (ناوەرۆکی بابەتەکان و زمانی خوێندن) و (لایەنی کارگێڕی و پەیوەست بوون بە وەزارەت) بەڕێوە دەچێت و گوتی: "قۆناغی یەکەم بە سەرکەوتوویی کۆتایی هات و لە قۆناغی دووەم دا چەندین بەڕێوەبەرایەتیمان یەکخستووە، کە بە هۆیەوە ژمارەی مامۆستایان گەیشتووەتە نزیکەی (33) هەزار مامۆستا".

بەڕێوەبەری پەروەردەی حەسەکە ئاماژەی بە ئەویش کرد، گۆڕانکاریی لە ناوەندەکانی تاقیکردنەوە دا دەکرێت و ڕاشیگەیاند: "ئەمساڵ تاقیکردنەوەکان لە شەش ناوچەی جیاواز (حەسەکە، قامیشلۆ، شەدادیە، تل کۆچەر، دێرک و سەرێ کانی) بەڕێوە دەچن، هەروەهایش تاقیکردنەوەکانی پڕۆگرامی بەڕێوەبەریی خۆسەر لە ژێر چاودێریی وەزارەتی پەروەردە دا دەبن".

عەدنان بەری جەختی لە ئەویش کردەوە، گۆڕانکاریی لە ناوی بەشێک لە خوێندنگەکان دەکرێت و گوتیشی: "ناوی قوتابخانەکان بە جۆرێک دەگۆڕدرێن، کە گوزارشت لە پێشەنگ و کەسایەتییە دیارەکانی سەرجەم پێکهاتە نەتەوەییە جیاوازەکان بکەن، هەروەهایش مامۆستایانیش بە پێی بڕوانامە و ساڵانی خزمەتیان لە شوێنی گونجاو دا دەمەزرێنەوە".