ئۆزگور ئۆزەل، سەرۆکی گشتیی پارتی نوێ (یەنی پارتی)، لە کاتی پێشکەشکردنی گوتارێکدا لە کۆبوونەوەی فراکسیۆنی پارتەکەی لە پەرلەمانی تورکیا، هەڵوێستی فەرمیی خۆیانی بەرامبەر پڕۆژەیاسای یاسای چوارچێوە ڕاگەیاند و ئاشکرای کرد، کە دەنگ بە "بەڵێ" دەدەن.
ئۆزگور ئۆزەل ئاماژەی بەوە کرد، بڕیاری پارتەکەیان لەسەر بنەمای متمانەکردن بە دەسەڵات نییە، بەڵکو لەسەر بنەمای ئیرادەی ئاشتی و بەرپرسیارێتیی مێژوویی و نیشتمانییە. دەشڵێت: "ئەم کێشەیە بە توندوتیژی چارەسەر نابێت، بەڵکو دەبێت بە ڕێگەی سیاسەت چارەسەر بکرێت".
سەرۆکی پارتی نوێ جەختی لەوە کردەوە، کێشەی کورد تەنها کێشەیەکی ئەمنی، تێرۆر یان چەکدانانی ڕێکخراوێک نییە، بەڵکو کێشەی هاوڵاتیبوونی یەکسان، سەروەریی یاسا، نوێنەرایەتیی دیموکراتی و ئازادیی سیاسییە.
ئۆزگور ئۆزەل ڕاشیگەیاند، پێکهاتەی دەوڵەتی یەکگرتوو هێڵی سووری ئەوانە، بەڵام چارەسەری دیموکراتی کێشەی کورد بە بەهێزکردنی ئەو پێکهاتەیە دەزانن نەک دژایەتیکردنی.
لە بەشێکی دیکەی گوتارەکەیدا، ئۆزەل ڕەخنەی توندی لە پارتی دسد و گەشەپێدان (ئاکەپە) گرت بەوەی دانوستانەکانی لەپشتی دەرگا داخراوەکان بەڕێوەبردووە و ئۆپۆزسیۆنی پەراوێز خستووە، هەروەها بڕگەکانی تایبەت بە بە دیموکراتی کردنی لە دەقی یاساکەدا لاداوە. لەگەڵ ئەوەشدا جەختی کردەوە، پارتەکەی لە پێناو ڕاگرتنی خوێنڕشتن و دروستکردنی داهاتوویەکی ئارام بۆ گەنجان، ڕێگری لە ئاشتی ناکات.
سەرۆکی پارتی نوێ ئاماژەی بەوەش کرد، تێپەڕاندنی ئەم یاسایە تەنها دەرگایەکە بۆ کۆتاییهێنان بە شەڕ، بەڵام خەباتی ڕاستەقینەی ئەوان بۆ دیموکراسی، ئازادکردنی زیندانیانی سیاسی (لەوانەش سەلاحەدین دەمیرتاش و جان ئاتالای)، هەڵوەشاندنەوەی بڕیاری قەیومەکان و جێبەجێکردنی بڕیارەکانی دادگای دەستووری لەمڕۆوە دەست پێ دەکات.
ئۆزگور ئۆزەل هەڵوێستی پارتەکەی لەسەر یاسای چوارچێوە ئاشکرا کرد
