لە باخچەی قەڵای شاری کەرکوک، بە ئامادەبوونی جەماوەرێکی بەرچاو و بە بەشداریی خاوەنکارانی هەرێم و ڕۆژهەڵاتی کوردستان، دووەمین فێستیڤاڵی فۆلکلۆری دەستیپێکرد.
لە فێستیڤاڵەکەدا 50 خاوەنکار لە شارە جیاوازەکانی هەرێمی کوردستان و ڕۆژهەڵاتی کوردستانەوە بەشدارن و بڕیارە چالاکییەکان بۆ ماوەی 5 ڕۆژ بەردەوام بن. بەشەکانی فێستیڤاڵەکە برتیین لە نمایشکردنی کاری دەستیی خانمانی کورد، جڵوبەرگی فۆلکلۆری و ئامادەکردنی خواردنە ڕەسەنە کوردەوارییەکان.
سەرپەرشتیاری فێستیڤاڵەکە ڕایگەیاند کە ئامانجی سەرەکییان لە سازدانی ئەم ڕووداوە کولتوورییە، پاراستن و بەزیندوو هێشتنەوەی کەلەپوور و کولتووری کوردییە لە کەرکوک.
فێستیڤاڵەکە جگە لە هاووڵاتییانی کورد، سەرنجی پێکهاتە و نەتەوە جیاوازەکانی دیکەی شاری کەرکوکیشی ڕاکێشاوە. لە لێدوانێکدا، دبلم فەتاح وەک بەشداربوویەکی فێستیڤاڵەکە و دونیا محەممەد وەک سەردانیکەر، خۆشحاڵی خۆیان دەربڕی بەرامبەر ڕەخساندنی ئەم دەرفەتە کولتووری و ئابوورییە بۆ خاوەنکاران.