کەشناسیی هەرێمی کوردستان، ڕاپۆرتی پێشبینییەکانی خۆی بۆ کەشوهەوای ئەمڕۆ و سبەی بڵاو کردەوە و هۆشداریی لە هاتنی شەپۆلێکی چڕی تۆزوخۆڵ دا.
کەشناسیی هەرێمی کوردستان لەبارەی گۆڕانکارییەکانی کەشوهەواوە ڕایگەیاند، ئەمرۆ هەینی شەپۆلێکی خۆڵبارین باشووری کوردستان دەگرێتەوە، لە ناوچە سنوورییەکانیش ئەگەری بارینی کەمێک نمەباران هەیە، دەڵێت: "خۆڵبارینەکە سەرەتا لە ناوچەکانی باشوور و ڕۆژئاوای هەرێمی کوردستانەوە دەست پێدەکات و ئێوارە کاریگەرییەکەی زیاد دەکات".
دیلان ڕەشاد گوتەبێژی وەزارەتی گواستنەوەی هەرێمی کوردستان، لەبارەی ئاراستە و چڕیی شەپۆلەکەوە ڕایگەیاند: "ئەمشەو خۆڵبارین لەسەر ناوچەکانی پارێزگاکانی سلێمانی، کەرکوووک، هەڵەبجە و هەولێر، هەروەها ئیدارەی گەرمیان زۆر زیاد دەکات". گوتیشی: "کاریگەریی ئەم شەپۆلە لە پارێزگای دهۆک و ئیدارەی سەربەخۆی زاخۆ لاواز دەبێت".
دیلان ڕەشاد ڕاشیگەیاند: "کاریگەریی خۆڵبارین لەسەر ناوچەکەمان تاوەکو کاتەکانی ئێوارەی سبەی شەممە بەردەوام دەبێت و دواتر کەمێک لاواز دەبێت. سبەی بەراورد بە ئەمڕۆ پلەی گەرما 3 بۆ 5 پلەی سیلیزی دادەبەزێت".
بهگوێرەی ئاماری کەشناسیی هەرێمی کوردستان، کە سەر بە وەزارەتی گواستنەوە و گەیاندنە، پلەی گەرمای پێشبینیکراو بۆ سبەی شەممە بەم شێوەیەیە:
- ههولێر: 30 پلەی سیلیزی
- سلێمانی: 31 پلەی سیلیزی
- کەرکووک: ٣٣ پلەی سیلیزی
- ههڵەبجە: 32 پلەی سیلیزی
- دهۆک: 26 پلەی سیلیزی
- زاخۆ: 27 پلەی سیلیزی
- گەرمیان: 35 پلەی سیلیزی
- چەمچەماڵ: 31 پلەی سیلیزی
- پیرمام: 26 پلەی سیلیزی
- حاجی ئۆمەران: 20 پلەی سیلیزی