بەرپرسانی سەربازیی ئەمریکا بە تۆڕی هەواڵی سی بی ئیس نیوزیان ڕاگەیاند، لە ئەنجامی هێرشە ئاسمانی و مووشەکییەکانی ئەم مانگەی ئێران بۆ سەر بنکە و سەربازگەکانی ئەمریکا لە ڕۆژهەڵاتی ناوەڕاست، نزیکەی 100 سەربازی وڵاتەکەیان بریندار بوون.
شان پارنێڵ، گوتەبێژی باڵای وەزارەتی جەنگی ئەمریکا (پێنتاگۆن)، ڕاستی بەرزبوونەوەی ئاماری بریندارەکانی پشتڕاست کردەوە و ڕایگەیاند، زۆربەی برینی سەربازەکان لە جۆری زەبر بەرکەوتنی سووکی مێشک بوون، هەروەها ئاماژەی بەوە کرد کە 96٪ی بریندارەکان دوای وەرگرتنی چارەسەر چاکبوونەتەوە و گەڕاونەتەوە سەر ئەرکەکانیان.
ئەمە کاتێکدایە، سوپای ئەمریکا ماوەی 10 ڕۆژە بەردەوام هێرشی ئاسمانی دەکاتە سەر ئامانجەکانی ناو خاکی ئێران و لە بەرامبەریشدا ئێران پێگە و بنکە سەربازییەکانی ئەمریکا لە وڵاتانی ناوچەکە دەکاتە ئامانج، کە تاوەکو ئێستا بووەتە هۆی کوژران و برینداربوونی زیاتر لە 100 سەربازی ئەمریکی.
سی بی ئیس: لە هێرشەکانی ئێراندا نزیکەی 100 سەربازی ئەمریکی بریندار بوون
