فەرماندەی گشتیی سوپای پاسدارانی ئێران، لە پەیامێکدا بەبۆنەی کۆتاییهاتنی ڕێوڕەسمەکانی بەخاکسپاردنی عەلی خامنەیی، ڕێبەری پێشووی کۆماری ئیسلامیی ئێران، بە توندی جەختی لە تۆڵەکردنەوەی خوێنی ناوبراو کردەوە و ڕایگەیاند، سزادانی ئەنجامدەران و بڕیاردەرانی ئەم تاوانە، داواکارییەکی لەبیرنەکراوە.
ئەمڕۆ هەینی، 10ی تەممووزی 2026، ئەحمەد وەحیدی، فەرماندەی گشتیی سوپای پاسداران، بەبۆنەی بەخاکسپاردنی عەلی خامنەیی پەیامێکی فەرمی بڵاوکردەوە. لە پەیامەکەیدا، وەحیدی سوپاسی گەلانی ئێران و عێراقی کرد بۆ بەشداریکردنی بەرفراوانیان لە ڕێوڕەسمی بەڕێکردنی تەرمەکەدا و جەختی کردەوە: "تۆڵەسەندنەوەی خوێنی عەلی خامنەیی، سزادانی ئەنجامدەران و بڕیاردەرانی، وەک داواکارییەکی ڕەوا دەمێنێتەوە."
فەرماندەی سوپای پاسداران هۆشداریی دا، ئەم دۆسیەیە تاوەکو هێنانەدیی تەواوی دادپەروەری و پێدانی وەڵامی شیاو بە تاوانباران، لە بیرەوەریی مێژوویی بەرەی بەرگریدا بە زیندوویی دەمێنێتەوە.
عەلی خامنەیی، ڕێبەری پێشووی ئێران، لە 28ی شوباتی 2026 و لە یەکەم ڕۆژی دەستپێکردنی جەنگدا، لە ئەنجامی هێرشە ئاسمانییە هاوبەشەکانی ئەمریکا و ئیسرائیل بۆ سەر تاران کوژرا، ئەمەش وەک گەورەترین وەرچەرخانی سەربازی و سیاسی لە ناوچەکەدا سەیر دەکرێت.
بەرپرسانی کۆماری ئیسلامیی ئێران بەرنامەیەکی یەک هەفتەییی بەرفراوانیان بۆ ماڵئاوایی و بەخاکسپاردنی تەرمی خامنەیی ڕێکخستبوو. پڕۆسەکە لە بەرەبەیانی ڕۆژی هەینی، 3ی تەممووزەوە بە گواستنەوەی تەرمەکە بۆ مزگەوتی گەورەی تاران (موسەڵلا) و بەشداریی شاندە بیانییەکان دەستی پێکرد.
دواتر لە ڕۆژانی شەممە تاوەکو دووشەممە لە تاران، ڕۆژی سێشەممە لە شاری قوم و ڕۆژی چوارشەممەش تەرمەکە گوێزرایەوە بۆ عێراق و لە شارەکانی نەجەف و کەربەلا ڕێوڕەسمی ئایینی و جەماوەریی بۆ ڕێکخرا. ڕۆژی پێنجشەممە، 9ی تەممووز، تەرمەکە بە فڕۆکە لە نەجەفەوە گەڕێندرایەوە بۆ شاری مەشهەد و سەرەنجام بەرەبەیانی ئەمڕۆ هەینی، لە مەزارگەی ئیمام ڕەزا بە خاک سپێردرا.
فەرماندەی گشتیی سوپای پاسداران هەڕەشەی سزادانی ئەمریکا و ئیسرائیل دەکات
