لە شاری وانی باکووری کوردستان، چالاکییەکانی فێستیڤاڵی کلتوریی وان بەردەوامییان هەیە و تێیدا چەندین چالاکیی جۆراوجۆر پێشکەش دەکرێن، بەڵام فێستیڤاڵی ئەمساڵ بەهۆی پەراوێزخستنی تەواوەتیی کلتور و هونەرمەندانی کورد، ڕووبەڕووی ڕەخنەی توند بووەتەوە.
ئەم فێستیڤاڵە، کە لەلایەن وەزارەتی ڕۆشنبیری و گەشتوگوزاری تورکیاوە ڕێکخراوە، چەندین چالاکیی جۆراوجۆری وەک کۆنسێرت، وۆرکشۆپ و پانێڵ لەخۆدەگرێت. بەڵام ئەوەی جێی سەرنج و تێڕامانی چاودێرانە، لە بەرنامەی فێستیڤاڵی ئەمساڵدا ناوی هیچ هونەرمەندێکی کورد نابینرێت، هاوکات هیچ چالاکییەک لە نێو کارنامەکەدا جێگیر نەکراوە، کە گوزارشت لە مێژوو، ناسنامە و کلتوری ڕەسەنی شاری وان بکات.
لەلایەکی دیکەوە، سەرجەم کارە تەکنیکی و ڕێکخستنییەکانی ئەم فێستیڤاڵە سپێردراونەتە ئاژانسێکی ڕیکلامی کە ڕاستەوخۆ لایەنگری پارتی دەسەڵاتداری تورکیایە (ئاکەپە).
ئەم ئاژانسە بەوە دەناسرێت، کە سەرپەرشتیی پڕۆژەکانی ناساندن و ڕێکخستنی کەمپینەکانی هەڵبژاردنی پارتی داد و گەشەپێدان (ئاکەپە)، سەرۆکایەتیی کۆماری تورکیا و چەندین دامەزراوەی گشتیی دیکەی ئەو وڵاتە دەکات، ئەمەش گومانی زیاتری لای چاودێران دروستکردووە، کە فێستیڤاڵەکە زیاتر ڕەهەندێکی سیاسیی هەیە نەک کلتوری.
بەبێ هونەرمەندانی کورد فێستیڤاڵی کلتوریی وان بەڕێوەدەچێت
