ڤۆلۆدیمێر زیلینسکی، سەرۆکی ئۆکرانیا ڕایگەیاند، ڕەزامەندیی لەسەر ئەنجامدانی زنجیرەیەک هێرشی نوێی دوورمەودا داوە وەک وەڵامێک بۆ هێرشە بەردەوامەکانی ڕووسیا بۆ سەر وڵاتەکەی، هەروەها ئامادەکارییەکان بۆ بەهێزکردن و فراوانکردنی توانا سەربازییە دوورمەوداکانی کێیف بەردەوامن.
سەرۆکی ئۆکرانیا جەختی لەوەش کردەوە، کیێڤ کار بۆ جێبەجێکردنی ئەو تەکنیک و ئامێرانە دەکات کە کاریگەرییان لەسەر خستنەخوارەوەی درۆنی جۆری "شاهد" هەیە و هەوڵی زیاترکردنی ئاستی بەرهەمهێنانیان دەدەن. لە لایەکی دیکەوە، وەزارەتی بەرگریی ڕووسیا ئاشکرای کرد، لە سەرەتای ئەمساڵەوە دەستیان بەسەر زیاتر لە پێنج هەزار و 300 کیلۆمەتر دووجا زەوی و 220 شارۆچکە و گونددا گرتووە، هەروەها لە شەوی ڕابردوودا 344 درۆنی ئۆکرانیایان خستووەتە خوارەوە و هێرشیان کردووەتە سەر بەندەرەکانی دەریای ڕەش.
لە بەرامبەردا، لایەنی ئۆکرانی ڕایگەیاند، لە 24 کاژێری ڕابردوودا نزیکەی هەزار و 500 سەربازی ڕووسی کوژراون و بریندار بوون. لە چەند مانگی ڕابردوودا هەردوو وڵات هێرشە دوورمەوداکانیان چڕتر کردووەتەوە، بەجۆرێک ئۆکرانیا بە بەردەوامی ژێرخانی نەوت و کۆگا ئابوورییەکانی ڕووسیا دەکاتە ئامانج تاوەکو فشاری ئابووری و تێچووی جەنگ لەسەر موسکۆ بەرز بکاتەوە.
زیلینسکی بڕیاری ئەنجامدانی زنجیرەیەک هێرشی نوێی دوورمەودای دژ بە ڕووسیا دا
