ناوەندی توێژینەوەی مەیدانی (SAMER) نوێترین راپرسیی خۆی لەبارەی پڕۆسەی ئاشتی و دیموکراتیزەکردن لە تورکیا بڵاوکردەوە؛ بەگوێرەی ئەنجامەکانی راپرسییەکە، زۆرینەی هەرە زۆری بەشداربووان داوای هاوێشتنی هەنگاوی یاسایی بەپەلە دەکەن، بە جۆرێک %86.2ی بەشداربووان داوای دابینکردنی مافی خوێندن بە زمانی دایک دەکەن.
راپرسییەکە لە نێوان 14 بۆ 21ی حوزەیرانی 2026 لە رێگەی ئۆنلاینەوە ئەنجامدراوە و 908 کەس لە 18 پارێزگای جیاوازی باکووری کوردستان و تورکیا (لەوانەش ئامەد، ئەستەنبوڵ، وان، ئەنقەرە، مێردین و شرناخ) تێیدا بەشداربوون، کە تێیدا تیشک خراوەتە سەر داواکارییەکانی شەقام بۆ سەرکەوتنی پڕۆسەکە.
داواکارییە یاساییەکان لە پێشینەن
کاتێک پرسیار لە بەشداربووان کراوە کە "بۆ پێشوەچوونی پڕۆسەی ئاشتی پێویستە چاکسازیی بەپەلە لە چ بوارێکدا بکرێت؟"، رێژەی ئەو کەسانەی وەڵامی "بێگومان هاوڕام"یان بۆ بژاردە یاسایی و سیاسییەکان داوەتەوە بەم شێوەیە بووە:
مافی خوێندن بە زمانی دایک: %86.2
هەڵگرتن یان کۆتاییهێنان بە سیستەمی قەیوم: %85.6
یاسای ئازادیی رادەربڕین و رێکخراوەیی: %84.8
گۆڕانکاری لە یاسای سزادانی تورکیا %81.4 :
دەرکردنی یاسا بۆ گەڕانەوەی گەریلاکانی پەکەکە لە چیاکانەوە: %79.0
دانپێدانان بە پێگەی دانوستاندکاری عەبدوڵڵا ئۆجەلان: %73.1
لەلایەکی دیکەوە، یاسای ناسراو بە "یاسای پەشیمانی" رووبەڕووی ناڕەزایەتی بووەتەوە و %44.2ی بەشداربووان بە توندی دژی بوونەتەوە.
کێشەی متمانە بە حکومەت و ئاستی گەشبینی
سەبارەت بە ئاستی متمانەی هاووڵاتیان بە جدیەتی حکومەت لە ئەنجامدانی چاکسازییە یاساییەکاندا، دەرکەوتووە کە کێشەیەکی قووڵی متمانە هەیە؛
%41.3ی بەشداربووان گوتوویانە "متمانەم نییە" و %33.1یش گوتوویانە "هیچ متمانەم نییە". بەشداربووان "کەمیی ئیرادەی سیاسی لەناو حکومەتدا" بە رێژەی %28.7 وەک گەورەترین کۆسپی بەردەم پڕۆسەکە دەبینن.
سەرباری بوونی ئەم گومانانە، هێشتا ئومێدێکی بەهێز لەلای هاووڵاتیان هەیە؛ لە وەڵامی پرسیاری "ئایا پێتوایە پڕۆسەکە بە ئەرێنی کۆتایی دێت؟"، %52.9ی بەشداربووان وەڵامیان داوەتەوە "بەڵێ"، لە بەرامبەردا %47.1 گوتوویانە "نەخێر".