سەرۆکوەزیرانی هەرێمی کوردستان، مەسرور بارزانی، لە ئاهەنگی دەرچووانی خولی ٣١ی زانکۆی دهۆک وتارێکی پێشکەش کرد و تێیدا ڕایگەیاند کە پەیوەندییەکانی هەرێم لەگەڵ حکومەتی عێراق زۆر باشە و ڕۆژ بە ڕۆژ زیاتر بەرەو پێش دەچێت، هاوکات جەختی لەوە کردەوە کە هەمیشە لەسەر هێڵن بۆ دابینکردنی ماف و شایستە داراییەکانی خەڵکی کوردستان.
لە گرنگترین تەوەرەکانی وتارەکەیدا، سەرۆکوەزیران ئەم خاڵانەی خستە ڕوو:
لەمپەرەکان لەبەردەم گەشەسەندن: ئاماژەی بەوە دا که زۆر ڕێگری لە هەرێمی کوردستان کراوە، ئەگەرنا لە ئێستادا کوردستان لە قۆناغێکی زۆر پێشکەوتووتری گەشەسەندنیدا دەبوو.
پرسی دامەزراندنی دەرچووانی زانکۆ: سەرۆکوەزیران نیگەرانیی خۆی دەربڕی لەوەی کە بەداخەوە لە ساڵی ٢٠١٣ـەوە حکومەتی عێراق هیچ دەرچوویەکی زانکۆی لە هەرێمی کوردستان دامەزراندووە، بەڵام جەختی کردەوە که بەردەوام لە گفتوگۆدان لەگەڵ بەغدا بۆ دۆزینەوەی چارەسەر و لە هەمان کاتیشدا هەوڵ بۆ ڕەخساندنی هەلی کار لە کەرتی تایبەت دەدەن.
پەیوەندی لەگەڵ هاوپەیمانان: سەبارەت بە داهاتووی ناوچەکە و دەرچوونی هێزەکانی هاوپەیمانان، مەسرور بارزانی ڕایگەیاند کە دەرچوونی هاوپەیمانان بە واتای کۆتاییپێهاتنی پەیوەندییەکان نایەت، و جەختیشی کردەوە که "کوردستان پێشمەرگەی هەیە و هەمیشە پارێزراو دەبێت."
جێبەجێکردنی دەستوور: هەمیشە جەخت لەسەر بنەمای جێبەجێکردنی تەواوی دەستوور کراوەتەوە و پێویستە هەمووان پێکەوە کار بۆ پاراستنی دەستکەوتەکانی نەتەوەیی و نیشتمانی بکەن.