بافڵ جەلال تاڵەبانی پەیوەندییەکی تەلەفۆنی لەلایەن د. عەباس عێراقچی، وەزیری دەرەوەی کۆماری ئیسلامیی ئێرانەوە پێگەیشت و لە ڕێگەیەوە دوا پێشهاتە ئەمنی، سیاسی و ئابوورییەکانی ناوچەکە تاوتوێ کران.
لەو پەیوەندییە تەلەفۆنییەدا، هەردوولا بیروڕایان لەبارەی رێگەچارەکانی کۆتاییهێنان بە ئاڵۆزییەکانی ئێستا ئاڵوگۆڕ کرد و جەختیان لە گرنگیی پاراستنی ئاشتی، سەقامگیری و بەهێزکردنی هەماهەنگی لە رووبەڕووبوونەوەی ئاڵەنگارییە هاوبەشەکاندا کردەوە.
بافڵ جەختی لە گرنگیی بەردەوامیی دیالۆگ و پەیوەندییە دیپلۆماسییەکان کردەوە وەک کاریگەرترین رێگا بەرەو هێورکردنەوەی ئاڵۆزییەکان و گەڕاندنەوەی ئاشتی، هەروەها دەستخۆشی لە وەزیری دەرەوەی ئێران کرد بۆ هەوڵە بەردەوامە دیپلۆماسی و بنیاتنەرەکانی لە گەڕان بەدوای چارەسەری ئاشتییانەدا.
لای خۆیانەوە، هەردوولا پەیوەندییە مێژووییە ستراتیژییەکەی نێوان یەکێتیی نیشتمانیی کوردستان و کۆماری ئیسلامیی ئێرانیان تاوتوێ کرد و پابەندبوونی خۆیان بۆ بەهێزکردنی پەیوەندییە دووقۆڵییەکان لەسەر بنەمای بەرژەوەندیی هاوبەش و دراوسێیەتیی باش دووپات کردەوە.
لە کۆتایی گفتوگۆکاندا، وەزیری دەرەوەی ئێران بانگهێشتی بافڵی کرد بۆ سەردانیکردنی تاران بەمەبەستی گفتوگۆی زیاتر لەسەر لێکەوتە ئەمنی و ئابوورییەکانی ململانێکان لەسەر ئاستی ناوچەکە و نێودەوڵەتی.