ژەنەڤییەڤ فرایس، فەیلەسوف و فیمینیستی ناوداری فەرەنسی و ئەندامی پێشووی پەرلەمانی ئەورووپا، پاڵپشتیی خۆی بۆ کەمپەینی نێودەوڵەتیی تایبەت بە "بانگەوازی ئاشتی و کۆمەڵگەی دیموکراتیک"ی عەبدوڵا ئۆجالان ڕاگەیاند.
فرایس لە پەیامێکدا ئاماژەی بەوە کردووە کە ناسنامەکان پێکهاتەیەکی جێگیر نین، بەڵکو پرۆسەیەکی مێژوویی و دینامیکن؛ ڕوونیشی دەکاتەوە کە ناسنامەی کوردی لە جوگرافیای میزۆپۆتامیا و ئانادۆڵدا شێوەی گرتووە و تێکەڵی ژیانی کولتووری و سیاسیی گەلانی دیکە بووە.
ئەو فیمینیستە فەرەنسییە دەڵێت: "بانگەوازەکەی عەبدوڵا ئۆجەلان بۆ ئاشتی، لەجیاتی دابڕینی کورد، پێوەندییەکان دەکاتە دیالۆگ، ئەمەش هەنگاوێکی زۆر لەجێی خۆیەتی."
ژەنەڤییەڤ فرایس جەختی لەوەش کردووەتەوە کە بنیاتنانی سیاسەتێکی یەکسانخواز و کۆچەر لە نێوان گەلانی کورد، تورک، عەرەب و فارس، پێویستییەکی سروشتییە بۆ ڕێزگرتن لە واقیعی مرۆڤایەتی و دەڵێت:
"کاتی ئەوە هاتووە خەبات دژی کۆڵۆنیالیزم و ناسیۆنالیزم بە دیدگایەکی فرەنەتەوەیی و نەک جوداخوازی بەڕێوەبچێت؛ پێموایە 'تێکەڵبوونی دیموکراتیک' کە ئۆجالان بۆ کوردی پێشنیاز دەکات، ڕێک ئەمەیە."
ژەنەڤییەڤ فرایس کێیە؟
لە ساڵی 1948 لەدایکبووە؛ فەیلەسوف، مێژوونووس و بیرمەندی فیمینیستی فەرەنسییە.
توێژینەوەکانی زیاتر لەسەر مێژووی سیاسیی ژنان، چەمکی یەکسانی، دیموکراسی و جێندەرییە.
بۆ ماوەیەکی درێژ لە ناوەندی نیشتمانیی فەرەنسا بۆ توێژینەوەی زانستی (CNRS) کاری کردووە.
لە نێوان ساڵانی 1999 بۆ 2004 ئەندامی پەرلەمانی ئەورووپا بووە و وەک یەکێک لە ناوە دیارەکانی فیمینیزمی هاوچەرخی فەرەنسا دەناسرێت.
ا