مەسرور بارزانی، سەرۆکی حکومەتی هەرێمی کوردستان پێشوازی لە ئەحمەد ئەنوەر، سەرۆکی دەستەی دەستپاکی هەرێمی کوردستان کرد.
لە دیدارەکەدا، سەرۆکی دەستەی دەستپاکی کورتەیەکی لەبارەی کار، چالاکی و هەنگاوەکانی دەستەکەیان لە ماوەی ڕابردوودا خستەڕوو.
لەلایەن خۆیەوە، سەرۆکی حکومەت جەختی لە گرنگیی بەهێزکردنی هاوئاهەنگی و هاریکاریی نێوان سەرجەم دەزگا پەیوەندیدارەکانی هەرێمی کوردستان کردەوە، بە ئامانجی ڕووبەڕووبوونەوەی ڕژدتر بەرامبەر گەندەڵی و ڕێگریکردن لە بەهەدەردانی سامانی گشتی.
هاوکات، مەسرور بارزانی پابەندبوونی تەواوی حکومەتی هەرێمی کوردستانی بە بەرەنگاربوونەوەی گەندەڵی بە هەموو جۆرەکانییەوە دووپات کردەوە و ڕایگەیاند، حکومەت ئامادەیە هەموو ئاسانکاری و پشتگیرییەک بۆ دەستەی دەستپاکی دابین بکات تاوەکو بتوانێت بە شێوەیەکی کاریگەرتر بەردەوام بێت لە کارەکانی.