بڕیارە لە کۆبوونەوەی پەرلەمانی عێراقدا کە دواینیوەڕۆی ئەمڕۆ یەکشەممە، ٤ی تشرینی یەکەمی ٢٠٢٦، بەڕێوە دەچێت، پەرلەمان دەنگ لەسەر ڕاسپاردەکانی لیژنەی نەوت و غاز بدات کە تایبەتن بە چارەسەرکردنی قەیرانی سووتەمەنی و یەکلاکردنەوەی پشکی ڕۆژانەی نەوتی هەرێمی کوردستان.
ئەندامێکی لیژنەی نەوت و غاز لە پەرلەمانی عێراق ڕایگەیاند کە ئەگەر ڕاسپاردەکان لە پەرلەمانەوە دەنگیان لەسەر بدرێت، دەبنە بڕیار و بە فەرمی ئاراستەی حکومەتی عێراق دەکرێن بۆ جێبەجێکردن.
بەگوێرەی زانیارییەکان، پێشنیاز و ڕاسپاردەکانی لیژنەکە بۆ کۆتاییهێنان بە قەیرانی سووتەمەنی لە هەرێمی کوردستان لەسەر دوو بژاردە چڕ بوونەتەوە:
ڕادەستکردنی پشکی نەوت: ئەو ٥٠ هەزار بەرمیل نەوتەی کە وەک پشکی ڕۆژانەی هەرێم دیاری کراوە، بدرێتە کۆمپانیای سۆمۆ (SOMO)، و لە بەرامبەردا وەزارەتی نەوتی عێراق بڕی پێویستی سووتەمەنی بۆ پارێزگاکانی هەرێمی کوردستان دابین بکات بە هەمان سیستەمی ناوچەکانی تری عێراق.
زیادکردنی پشک و نرخی پاڵپشتیکراو: ئەگەر بژاردەی یەکەم جێبەجێ نەکرێت، ئەوا بڕی ٥٠ هەزار بەرمیلە ڕۆژانەکەی پشکی هەرێم زیاد بکرێت و سووتەمەنی بە نرخی پاڵپشتیکراو (هاوشێوەی پارێزگاکانی عێراق) بۆ هاووڵاتییانی هەرێم دابین بکرێت.
جگە لەم بابەتە، بڕیارە لە خشتەی کاری کۆبوونەوەی ئەمڕۆدا خوێندنەوەی یەکەیەم و دووەم بۆ سێ پڕۆژەیاسا بکرێت و دەنگیش لەسەر هەموارکردنی پڕۆژەیاسایەک بدرێت.