لە چاوپێکەوتنێکدا لەگەڵ میدیا عەرەبییەکان، مەسرور بارزانی سەرۆکی حکومەتی هەرێمی کوردستان ڕایگەیاند کە هەرێمی کوردستان لە سەرەتای قەیرانەکانەوە بێلایەنیی خۆی پاراستووە و نەبووەتە بەشێک لە ململانێ سەربازییەکان، بەڵام سەرەڕای ئەوەش، ڕووبەڕووی زیاتر لە هەزار هێرشی مووشەکی و درۆنیی بێ هۆکار بووەتەوە.
لەو دیمانەیەدا کە تیشکی خستە سەر دۆخی سیاسی، ئەمنی و ئابووریی ناوچەکە، مەسرور بارزانی جەختی لەوە کردەوە کە هێرشەکان بۆ سەر هەرێمی کوردستان لە لایەن هەندێک گرووپی چەکدار و لە ناوخۆی ئێرانەوە ئەنجام دراون، کە بوونە هۆی زیانگەیشتن بە ژێرخان و گیانلەدەستدانی هاووڵاتییانی سڤیل، لە کاتێکدا هەرێم هەرگیز هەڕەشە نەبووە بۆ سەر دراوسێکانی.
سەبارەت بە دۆخی سەربازی و بنکەکان، بارزانی ڕەتی کردەوە بنکەی سەربازیی حەریر شوێنی مانەوەی هێزی ئەمریکی بێت و ڕایگەیاند کە ئەو بنکەیە ١٠ ساڵە بۆ تێکشکاندنی داعش بەکارهاتووە و لە ساڵی ٢٠١٧وە بە تەواوی چۆڵ کراوە و هیچ سەربازێکی تێدا نەماوە.
هەروەها پشتیوانیی حکومەتی هەرێمی کوردستانی بۆ هەنگاوەکانی حکومەتی فیدراڵی لەپێناو کۆنتڕۆڵکردن و نەهێشتنی چەکی دەرەوەی دەوڵەت دووپات کردەوە.
لە تەوەرێکی تری قسەکانیدا لەبارەی ئابووری و کاریگەریی جەنگ لەسەر بازرگانی، ئاماژەی بەوە دا کە بەهۆی نائارامییەکان و داخستنی گەروی هورمز و پچڕانی هەناردەی نەوت، قەبارەی بازرگانی لەگەڵ وڵاتانی دراوسێ بە ڕێژەی ٧٠٪ دابەزیوە.
جەختیشی کردەوە که پێویستە عێراق یاسایەکی هاوچەرخی نەوت و گاز دەربکات کە مافی سەرجەم پێکهاتەکان مسۆگەر بکات.
سەبارەت بە پەیوەندییە دەرەکییەکان و دۆخی ناوچەکە، بارزانی پەیوەندییەکانی هەرێمی لەگەڵ ئەنقەرە بە باش و بەهێز وەسف کرد و جەختی لەوە کردەوە کە چارەسەری پرسی کورد لە تورکیا کلیلی ئاشتیی سەرتاسەریی ناوچەکەیە، هەروەها پێشوازیی لە دیالۆگی نێوان بەڕێوەبەرایەتیی خۆسەر و دەسەڵاتی دیمەشق کرد.
جێی باسە مەسرور بارزانی بە فەرمی ڕەتی کردەوە کە هەرێمی کوردستان هیچ پەیوەندییەکی لەگەڵ ئیسرائیل هەبێت.