مەسروور بارزانی، سەرۆکی حکومەتی هەرێمی کوردستان، بەردی بناغەی پڕۆژەی مزگەوتی گەورەی بارزانی دانا، کە وەک گەورەترین پڕۆژەی مزگەوت لەسەر ئاستی ڕۆژهەڵاتی ناوەڕاست ئەژمار دەکرێت.
ئەم پڕۆژە ستراتیژی و مێژووییە، بە دیزاینێکی ناوازە و لەسەر شێوازی ڕەشماڵی ڕەسەنی کوردی دروست دەکرێت، ئەمەش ڕەنگدانەوەی ناسنامەی کلتوریی ناوچەکەیە لە تەلارسازیی ئایینیدا.
پڕۆژەکە لەسەر ڕووبەرێکی بەرفراوان کە دەگاتە دوو ملیۆن مەتر دووجا جێبەجێ دەکرێت و توانای لەخۆگرتنی هەزاران نوێژخوێنی هەیە.
مزگەوتی گەورەی بارزانی تەنیا شوێنێک نابێت بۆ ئەنجامدانی نوێژ و بۆنە ئاینییەکان، بەڵکو وەک ناوەندێکی پێشکەوتووی زانستی و خوێندنی ئیسلامی کار دەکات.
هەروەها دەبێتە سەکۆیەکی گەورە بۆ بڵاوکردنەوەی پەیامی میانڕەوی و قووڵکردنەوەی فەرهەنگی پێکەوەژیانی ئاشتییانەی نێوان سەرجەم ئایین و پێکهاتە جیاوازەکان لە هەرێمی کوردستاندا.
هاوشانی تەلار و هۆڵەکانی خوێندن و نوێژکردن، پڕۆژەکە ڕەهەندێکی ژینگەیی و گەشتیاریی گرنگیش لەخۆدەگرێت؛ لە چوارچێوەی ڕووبەری دیاریکراودا، پارکێکی گشتیی گەورە و دەریاچەیەکی دەستکردی بەرفراوان دروست دەکرێن، کە سیمایەکی سروشتیی جوان و ناوازە بە تەواوی ناوچەکە دەبەخشن.