بە بەشداریی هەزاران کەس تەرمی سیپان حوزنی لە حەسەکە بە خاک سپێردرا

ئامادەبوونی هەزاران هاوڵاتی، تەرمی سیپان حوزنی، ئەو شەڕڤانەی لەلایەن چەند چەکدارێکەوە سەربڕدرابوو، لە شاری حەسەکەی ڕۆژئاوای کوردستان بە خاک سپێردرا.

لە مەراسیمی بەخاکسپاردنەکەدا، بەشداربووان بە گوتنەوەی دروشمی "شەهید نامرن" و بەرزکردنەوەی وێنەکانی، تەرمەکەیان بەڕێ کرد. سیپان حوزنی بۆ چەندین ساڵ لە ڕیزی هێزەکانی سوریای دیموکرات (هەسەدە) شەڕی دژی داعش و گروپە چەکدارەکانی کردبوو، لە کاتێکدا شەهیدبوونی ناوبراو هاوکاتە لەگەڵ هەڵوەشاندنەوەی هەسەدە و تێکەڵکردنی هێزەکانی لە ناو چوارچێوەی سوپای سوریادا.

شەهید بوونی سیپان حوزنی و شێوازی تاوانەکە کاردانەوە و توڕەیییەکی زۆری لێ کەوتووەتەوە، لە شارەکانی ڕۆژئاوای کوردستان خۆپێشاندان دژی ئەم ڕووداوە بەڕێوە چووە و داواکارییەکان بۆ ڕادەستکردن و سزادانی ئه‌نجامده‌رانی تاوانەکە بە گوێرەی یاسا بەردەوامن.