وەزارەتی دارایی و ئابووریی هەرێمی کوردستان ڕێنمایی ژمارە (٦)ی ساڵی ٢٠٢٦ی بە واژۆی ئاوات جەناب نووری دەرکرد و بەپێی و رێنماییە نوێیە کەمترین مووچەی مانگانەی خانەنشینی بۆ کرێکارانی کەرتی تایبەت بە بڕی ٥٠٠ هەزار دینار دیاریکرا.
لە ڕێنماییەکەدا مەرج و رێوشوێنەکانی وەرگرتنی مووچەی خانەنشینی بەسەر چەند بەشێکدا دابەش کراون:
مەرجی تەمەن و خزمەت: پیاو دەبێت تەمەنی ٦٠ ساڵ و ئافرەت ٥٥ ساڵی تەواو کردبێت بە مەرجی هەبوونی لانیکەم ٢٠ ساڵ خزمەتی دەستەبەرکراو، یان بەبێ رەچاوکردنی مەرجی تەمەن، پیاو پێویستی بە ٣٠ ساڵ و ئافرەت بە ٢٥ ساڵ خزمەتی دەستەبەرکراو هەیە.
حاڵەتەکانی کەمئەندامی: ئەو کرێکارانەی بەڕێژەی ١٠٠٪ تووشی نەخۆشیی پیشەیی دەبن بەپێی راپۆرتی لیژنەی پزیشکی، یان لە کاتی کاردا تووشی پێکان دەبن و دەبێتە هۆی پەککەوتنی تەواویان.
کۆچی دوایی: ئەگەر کرێکار لە ماوەی خزمەتیدا کۆچی دوایی بکات و ناوی لە تۆمارەکانی دەستەبەریی کۆمەڵایەتیدا بەردەوام بێت، خێزان و جێماوەکانی مافی وەرگرتنی مووچەکەیان دەبێت.
ئەم رێنماییە لە ڕۆژی دەرچوونییەوە جێبەجێ دەکرێت و لە ڕۆژنامەی فەرمی (وەقایعی کوردستان) بڵاودەکرێتەوە.
