لی جەی میونگ، سەرۆکی کۆریای باشوور، پێشنیاری دەستپێکردنی گفتوگۆی ڕاستەوخۆی لەگەڵ کۆریای باکوور کرد بۆ ئەوەی بە فەرمی کۆتایی بە جەنگی درێژخایەنی نێوانیان بهێندرێت.
ئەم پێشنیارە لە کاتێکدایە، پیۆنگیانگ پەیوەندییە سەربازی و ئابوورییەکانی لەگەڵ ڕووسیا بەهێزتر کردووە و جەخت لە بوونی خۆی وەک دەوڵەتێکی ئەتۆمی دەکاتەوە.
هەردوو کۆریا تاوەکو ئێستا لە ڕووی تەکنیکییەوە لە حالتێگی جەنگدان، چونکە جەنگی ساڵانی 1950-1953 بە ئاگربەست کۆتایی هات نەک بە ڕێککەوتنامەی ئاشتیی هەمیشەیی.
لی جەی میونگ لە ساڵیادی ڕزگاربوونی کۆریا لە ژێر دەسەڵاتی ژاپۆن داوای کرد هەڕەشەکان وەلا بنرێن و ڕێکاری کاریگەر بۆ ڕاگرتنی پەرەپێدانی چەکی ئەتۆمیی کۆریای باکوور بگرنە بەر.
شرۆڤەکاران ئاماژە دەکەن، کۆریای باکوور لە بەرامبەر ناردنی سەرباز و تەقەمەنی بۆ جەنگی ئۆکراینا، هاوکاریی دارایی، خۆراک، وزە و تەکنەلۆژیای سەربازی لە ڕووسیاوە پێ دەگات، هەروەها چاوەڕوان دەکرێت کیم جۆنگ ئون لە کۆتایی ئەمساڵدا سەردانی ڕووسیا بکات.
پیۆنگیانگ سەرکۆنەی مانۆڕە هاوبەشەکانی ئەمریکا و کۆریای باشووری کردووە و لە توانای سەربازیی ژاپۆنیش نیگەرانە. لە بەرامبەردا ئەمریکا نزیکەی 28 هەزار و 500 سەربازی لە کۆریای باشوور جێگیر کردووە.
سەرۆکی کۆریای باشوور پێشنیاری دەستپێکردنی گفتوگۆ لەگەڵ کۆریای باکوور دەکات
