بەگوێرەی هەوڵێکی ئاژانسی ڕۆیتەرز، ئیسرائیل و حیزبوڵڵای لوبنانی گەیشتوونەتە ڕێککەوتن بۆ نوێکردنەوەی ئاگربەست لە نێوانیاندا، کە لە کاژمێر 4:00ی ئێوارەی ئەمڕۆ هەینی چووەتە بواری جێبەجێکردنەوە.
ئاژانسی ڕۆیتەرز لە زاری بەرپرسێکی باڵای ئەمریکییەوە (کە نەیویستووە ناوی ئاشکرا بکرێت) ڕایگەیاندووە: "حیزبوڵڵا و ئیسرائیل لەسەر ئاگربەستەکە ڕێککەوتوون."
ئەو بەرپرسە ئاماژەی بەوەش کردووە کە ئەمریکا و قەتەر بە هاوکاری و یارمەتیی ئێران ئەم ڕێککەوتنەیان داڕشتووە و گوتیشی: "دوای ئەو گرژی و گۆڕینەوەی ئاگرەی کە بەرەبەیانی ئەمڕۆ ڕوویدا، لە ئێستادا ئیسرائیل و حیزبوڵڵا لە دۆخی ئاگربەستدان."
ئەم پێشهاتە دیپلۆماسییە لوتکەی پاش شەپۆلێکی توندی پێکدادانەکانی چەند کاتژمێری ڕابردوو دێت.
هەر ئەمڕۆ هەینی، لە ئەنجامی بۆردوومانە چڕەکانی ئیسرائیل بۆ سەر چەند ناوچەیەکی لوبنان لانی کەم 21 کەس کوژران، ئەمەش وەک وەڵامێک بوو بۆ کوژرانی چوار سەربازی ئیسرائیلی لە باشووری ئەو وڵاتە لەلایەن حیزبوڵڵاوە.
سەرەڕای بڵاوبوونەوەی ئەم هەواڵە، وتەبێژی سوپای ئیسرائیل (IDF) لە کۆنفراسیەکی ڕۆژنامەوانیدا ئامادەنەبوو بە فەرمی ددان بە وجودی ئاگربەستەکەدا بنێت و ڕایگەیاند: "ئێمە بەپێی ئەو ڕێنماییە سیاسییانەی پێماندراوە بەردەوام دەبین لە کارەکانمان، مەگەر ئەو ڕێنماییانە بگۆڕدرێن."
هاوکات، تاران بە توندی سەرکۆنەی هێرشەکانی ئیسرائیلی کرد و هۆشدارییدا کە هەر ڕێککەوتنێک لەگەڵ واشنتندا، بەستراوەتەوە بە ڕاگرتنی تەواوەتی شەڕ لە لوبنان، بەپێی ئەو بەندە سەرەتاییانەی لە نێوان هەردوولادا واژۆ کراون.
گرژییەکانی کاتژمێرەکانی ڕابردوو کاریگەریی ڕاستەوخۆیان لەسەر پەیوەندییە دیپلۆماسییەکان هەبوو؛ جەی دی ڤانس، جێگری سەرۆکی ئەمریکا، گەشت و کۆبوونەوە چاوەڕوانکراوەکانی لەگەڵ شاندی ئێرانی لە سویسرا دواخست.
ڤانس پێشتر ڕەخنەی لە هێرشەکانی ئیسرائیل گرتبوو و ڕایگەیاندبوو کە ئەو ئۆپەراسیۆنانە پڕۆسەی دانوستانە هەستیارەکانی خستووەتە مەترسییەوە.