دوای ڕووخانی ڕژێمی بەشار ئەسەد، پڕۆسەی پێکهێنانی پەرلەمانی (ئەنجوومەنی گەلی سووریا)، گەیشتووەتە قۆناغی کۆتایی و ئێستا ئامادەکارییەکان بۆ هەڵبژاردنی نوێنەرانی پارێزگای حەسەکە دەستیان پێ کردووە.
ئەمڕۆ سێشەممە (12) ی ئایاری (2026)، لیژنەی باڵای هەڵبژاردنەکان لە سوریا ڕایگەیاند، پەرلەمانی نوێی سوریا لە 210 کورسی پێک دێت. بە گوێرەی بڕیاری حکومەتی کاتی، 140 نوێنەر لە ڕێگەی دەستەی هەڵبژاردنە خۆجێییەکانەوە هەڵدەبژێردرێن و 70 نوێنەرەکەی دیکەیش لە لایەن ئەحمەد شەرع، سەرۆکی کاتیی سوریاوە دەستنیشان دەکرێن.
لیژنەی باڵای هەڵبژاردنەکان لە بارەی دۆخی پارێزگاکانەوە ڕایگەیاند، تا ئێستا لە هەموو پارێزگاکان جگە لە حەسەکە و سوەیدا پڕۆسەکە کۆتایی هاتووە و گوتی: "لە پارێزگای حەسەکە 13 کورسی هەیە، کە هەشت کورسییان بە هەڵبژاردنی خۆجێیی و پێنج کورسییەکەی دیکە لە لایەن سەرۆکی کاتییەوە دیاری دەکرێن".
هەر لەو چوارچێوەیەدا، لیژنەکە ئاماژەی بەوە کردووە، لقەکانی لە شارەکانی حەسەکە، قامیشلۆ و دێرک دامەزراون و ڕایگەیاند: "دوای تەواوبوونی پێکهێنانی لیژنە خۆجێییەکان و ئامادەکردنی لیستی کۆتایی، پڕۆسەی دەنگدان لە بازنەکانی پارێزگای حەسەکە دەست پێ دەکات و ئەنجامەکان بە فەرمی ڕادەگەیەنرێن".
پارێزگای حەسەکە ئامادەکاری بۆ هەڵبژاردنی ئەندامانی بۆ پەرلەمانی سوریا دەکات
