دەستەی کەشناسیی عێراق پێشبینییەکانی بۆ کەشوهەوای چوار ڕۆژی داهاتوو ڕاگەیاند و ئاماژە بە بەرزبوونەوەی ئاستی خۆڵبارین و نمە باران لە ناوچەکانی هەرێمی کوردستان و باکوری عێراق دەکات.
ئەمڕۆ سێشەممە (12) ی ئایاری (2026)، دەستەی کەشناسی لە ڕاگەیەندراوێکدا ئاماژەی بەوە کردووە، بەیانی چوارشەممە لە ناوچەکانی ناوەڕاست و باشور کەشوهەوا ساماڵ و پەڵە هەور دەبێت، بەڵام لە ناوچەکانی هەرێمی کوردستان و باکوری عێراق ئاسمان نیمچە هەور دەبێت و ئەگەری بارینی نمە بارانی سوک هەیە.
دەستەی کەشناسی لەبارەی خۆڵبارینەوە ڕایگەیاند، خێرایی با لە ئاراستەی باکوری ڕۆژئاواوە زیاد دەکات و دەگاتە زیاتر لە 30 کم/ک و گوتی: "خێرایی با دەبێتە هۆی بەرزبوونەوەی تۆز و خۆڵ لە چەندین ناوچەی جیاوازدا".
سەبارەت بە پلەکانی گەرما، پێشبینی دەکرێت سبەینێ لە دهۆک و سلێمانی 30 پلە، هەولێر 31، کەرکوک 37 و لە بەغدا 39 پلەی سیلیزی تۆمار بکرێت، لە کاتێکدا بەرزترین پلەی گەرما لە پارێزگاکانی نەجەف و زیقار دەبێت کە دەگاتە 43 پلە.
کەشناسی ڕایگەیاند: "ڕۆژی پێنجشەممە کەشوهەوا بە شێوەیەکی گشتی نیمچە هەور دەبێت، بەڵام بۆ ڕۆژانی هەینی و شەممە خێرایی با زیاتر دەبێت و دەگاتە 40 کم/ک، ئەمەیش دەبێتە هۆی دروستبوونی شەپۆلێکی خۆڵبارین و کەمبوونەوەی مەودای بینین".
کەشناسی عێراق: پلەکانی گەرما دادەبەزن
