دوای زیاتر لە ساڵێک لە بەڕێوەچوونی دادگاییکردنێکی چڕ، دادگای باڵای هەرێمی میونشن لە ئەڵمانیا، سزای زیندانیی بەسەر ژن و مێردێکی بەڕەگەز عێراقیدا سەپاند، ئەوەش دوای ساغبوونەوەی تۆمەتەکانی ئەندامێتی لە ڕێکخراوی داعش، کۆیلایەتی، دەستدرێژیی سێسی و ئەنجامدانی تاوانی جینۆساید دژی دوو کچی کوردی ئێزدی.
دادگاکە سزای زیندانیی هەتاهەتایی بەسەر مێردەکەدا سەپاند و ژنەکەشی بە 9 ساڵ و نیو زیندانییکردن سزادا. بەپێی بڕیاری دادگا، حوکمەکە دوای ئەوە هاتووە کە بە بەڵگەوە سەلمێندراوە ئەو ژن و مێردە لە کاتی دەسەڵاتی داعشدا لە عێراق، دوو کچی کوردی ئێزدییان وەک کۆیلە کڕیوە، چەوساندوویاننەتەوە و مێردەکەش کە پێشتر لە شاری میونشن کاری سەرتاشیی کردووە و لەوێ توندڕەو بووە، دەستدرێژیی سێسی کردووەتە سەر ئەو منداڵانە.
نوێنەری داواکاری گشتیی فیدراڵیی ئەڵمانیا لە کاتی خوێندنەوەی سکاڵاکەدا بە توندی ئیدانەی ڕەفتاری ئەو تۆمەتبارانەی کرد و ڕایگەیاند: "ئەو توندوتیژییە دڕندەیەی ئەنجامدراوە هێندە لە مرۆڤایەتییەوە دوورە، بە تەواوی نادروست و ناهەموار دەردەکەوێت." جەختیشی کردەوە کە هەموو ئەو کارانە لە پێناو ئامانجی سەرەکیی داعشدا بووە کە قڕکردن و لەناوبردنی ئایینی ئێزدییەکان بووە.
لە کاتی بەڕێوەچوونی دادگاییکردنەکەدا، هاوسەرە تەمەن 30 ساڵانەکە لە دوا گوتەی خۆیدا داوای لێبوردنی کرد و گوتی "داوای لێبوردن دەکەم و پەشیمانم"، لە کاتێکدا مێردەکەی ئامادە نەبوو هیچ قسەیەک لەبەردەم دادوەردا بکات.