مەحموود ئاریکان، سەرۆکی پارتی سەعادەت (Saadet Partisi)، لە زیندانی جۆری F لە شاری ئەدیرنە، سەردانی سەڵاحەدین دەمیرتاش، هاوسەرۆکی پێشووتری پارتی دیموکراتی گەلانی کرد و ڕایگەیاند کە پەیوەندی و گفتوگۆکانیان لەگەڵیدا بەردەوام دەبن.
مەحموود ئاریکان، ئەمڕۆ دووشەممە 13ی تەممووزی 2026، لە ڕاگەیێندراوێکی نووسراودا دوای دیدارەکە ئاماژەی بەوە کرد، لەگەڵ دەمیرتاشدا کۆبووەتەوە و بیروڕایان گۆڕیوەتەوە.
ئاریکان گوتی: "دەرفەتێکی باش بوو بۆ ئەوەی بە شێوەیەکی گشتگیر هەڵسەنگاندن بۆ کێشە بنەڕەتییە سیاسی و یاساییەکانی وڵاتەکەمان بکەین."
سەرۆکی پارتی سەعادەت لە بەشێکی دیکەی ڕاگەیێندراوەکەیدا جەختی لەسەر گرنگیی دیالۆگ کردەوە و گوتی: "لەم دیدارەدا بە خۆشحاڵییەوە بینیمان کە هاوڕاین لەسەر ئەوەی پێویستە لە دژی کەشی جەمسەرگیری لە وڵاتدا، زەمینەی دیالۆگ لە ژێر هەر بارودۆخێکدا بە زیندوویی بهێڵدرێتەوە.
تورکیا لە ململانێی ڕۆژانە و زمانی گرژی و ئاڵۆزی ماندوو بووە. بەڕێز دەمیرتاش کارەکتەر و کەسایەتییەکی سیاسیی گرنگی کایەی سیاسیی وڵاتەکەمانە، و بڕوامان وایە لە چوارچێوەی سیاسەتێکی دیموکراتی و شەرعیدا، دەتوانێت هاوکاریی و دەورێکی زۆر گرنگ لە پێناو تەبایی کۆمەڵایەتی، هاوپشتی و برایەتیدا بگێڕێت."
ئاریکان ڕەخنەی توندی لە بەردەوامیی زیندانیکردنی دەمیرتاش گرت و ڕایگەیاند: "مانەوە لە زیندان بۆ ماوەی چەندین ساڵ بەبێ هەبوونی بڕیارێکی کۆتایی و یەکلاکەرەوەی دادگا، نەک تەنیا متمانە بە دادپەروەری لاواز دەکات، بەڵکو متمانە بە دامەزراوەی سیاسەتیش لەکەدار دەکات."
لە کۆتاییشدا دڵنیایی دا کە ئەم پەیوەندییە مرۆیی و سیاسییانە و گۆڕینەوەی بیروڕایان لە قۆناغەکانی داهاتووشدا بەردەوام دەبێت.