چەند سەرچاوەیەکی ئاگاداربە ماڵپەڕی مۆنیتەریان ڕاگەیاندووە کە سوپای ئەمەریکا دەستپێکردنی قۆناغی کۆتایی پاشەکشە و دەرچوونی هێزەکانی لە خاکی عێراق دەست پێکردووە، بە جۆرێک کە دواین هێزەکانی لە نزیک فڕۆکەخانەی هەولێر لە هەرێمی کوردستان کشانەوە و سیستمی دژەمووشەکیی پاتریۆت لەو ناوچەیە گواسترانەوە.
بەگوێرەی ئەو زانیارییانەی دراون، سیستمی مووشەکیی خێرای پاتریۆت کە بۆ تێکشکاندنی مووشەک و درۆنەکان بەکار دێن، لە بنکە سەربازییەکەی نزیک هەولێر دابەزێنراون و گواستراونەتەوە بۆ شوێنێکی نادیار.
پاشەکشەکە لە هەفتەی ڕابردووەوە دەستی پێکردووە و هێزەکان لەگەڵ ئامێرە قورسەکانیان لە پرۆسەی چووەدەرەوەدان، هەرچەندە هەندێک چەکی بەرگریی تر هێشتا لە شوێنی خۆیان ماونەتەوە.
نیگەرانیی کورد لە بەجێهێشتنیان بێ پەناگەی ئاسمانی
بەرپرسانی ناوچەکە ئەم کشانەوەیە وەک بەشێک لە خشتەی کاتی ڕێککەوتنی نێوان واشنتن و بەغدا دەناسێنن، کە بڕیارە تا ٣٠ی ئەیلوولی داهاتوو سەرجەم هێزەکانی ئەمەریکا لە عێراق بکشێنەوە؛
بەڵام هێرشە بەردەوامەکانی ئێران و گرووپە نزیکەکانی بۆ سەر هەرێمی کوردستان، کوردەکانی خستووەتە دۆخێکی مەترسیدارەوە و هەستیان بە بێپەنایی کردووە.
لە کاتی دەستپێکردنی ململانێکانەوە لە مانگی شوباتی ئەمساڵەوە، فڕۆکەخانەی هەولێر و پێگەکانی ئەمەریکا چەندین جار کەوتوونەتە بەر هێرشی مووشەکی و درۆنیی ئێران و میلیشیاکان؛ بەڵام سیستمی پاتریۆت توانیویەتی نزیکەی ٩٥٪ی ئەو هێرشانە تێکشکێنێت و بپارێزێت.
ئێستا بە کشاندنەوەی ئەم سیستمانە، هەرێمی کوردستان و هێزەکانی تێیدا بێ بەرگریی ئاسمانیی پێشکەوتوو ماونەتەوە، چونکە بە گوتەی شارەزایان، ئێستا پێشەنگیی پاراستنی ئەمەریکا لە ناوچەکەدا بۆ کەنداو و ئوردنە نەک هەرێمی کوردستان.
کەمبوونەوەی پاشەکەوتی مووشەکیی پاتریۆت
ڕاپۆرتێکی ناوەندی لێکۆڵینەوەی ستراتیژی و نێودەوڵەتی لە واشنتن ئاماژەی بەوە کردووە کە لەگەڵ تێکچوونی ئاگربەستی نێوان ئەمەریکا و ئێران، پاشەکەوتی مووشەکە بەرگرییەکانی پاتریۆتی ئەمەریکا بە ڕێژەیەکی بەرچاو کەمی کردووە، بە جۆرێک لە کۆی سیستمی گشتی، ڕێژەیەکی بەرچاو لە مووشەکەکان لەدەستچوون و ساڵانە تەنیا ١٨٣ مووشەکی نوێ بەرهەم دەهێنرێن، ئەوەش وای کردووە واشنتن سەرچاوەکانی خۆی لە ناوچەکەدا بەپێی مەترسییەکان دابەش بکاتەوە.