دۆناڵد ترەمپ، سەرۆکی ویلایەتە یەکگرتووەکانی ئەمریکا، ڕایگەیاند، ستراتیژی وڵاتەکەی بەرامبەر بە کۆماری ئیسلامیی ئێران سەرکەوتوو بووە و هۆشداریشیدا، کە ئاگربەستی ئێستا لەژێر مەترسیی هەڵوەشانەوەدایە.
سەرۆکی ئەمریکا ئاشکرای کرد: "پلانەکانی بۆ گەمارۆدانی ئێران بەشێک بووە لە ستراتیژییەکی سەربازیی زیرەکانە". جەختیشی لەوە کردەوە، لەبارەی دۆخی ئێستاوە هەست بە هیچ نیگەرانی و گوشارێک ناکات.
دۆناڵد ترەمپ لەبارەی هەوڵەکانی پێشووی بۆ دانوستان، تایبەت بە میدیاکان ڕایگەیاند: "ئێرانییەکان پێشنیازێکی گەمژانەیان پێشکەش کردبوو کە جێگەی قبووڵکردن نەبوو". گوتیشی: "بە تووندی لە ئێرانمان دا و ئەنجامیشی هەبوو".
سەرۆکی ئەمریکا ڕاشیگەیاند: "نائومێدم لەو کوردانەی کە چەکمان پێ دان بیبەنە ناو ئێران، کەچی بۆ بەرژەوەندیی خۆیان بردیان". ئاماژەی بەوەش کرد، لە نێو ئێرانیشدا وەک ئەمریکا خەڵکی ژیر و شێت هەن.
سەرۆکی ئەمریکا جەختی لەوە کردەوە، دۆخی ئێستای ناوچەکە بە وردی چاودێری دەکرێت و گوتیشی: "ئەو ئاگربەستەی لەگەڵ ئێران هەیە، ئێستا لەژێر چاودێرییەکی چڕدایە و خەریکە کۆتایی دێت".