سەرۆکی یەکێتیی مامۆستایانی کوردستان ڕایگەیاند، سەرجەم مامۆستایانی گرێبەست لە کارەکانیان بەردەوام دەبن و گرێبەستەکانیان نوێ دەکرێتەوە. وەزارەتی خوێندنی باڵاش دەڵێت، نوێکردنەوەی گرێبەستی مامۆستایانیان تەواو کردووە.
ئەحمەد گەرمیانی، سەرۆکی یەکێتیی مامۆستایانی هەرێمی کوردستان دەڵێ، "هیچ مامۆستایەکی گرێبەست لەلایەن حکومەتەوە لانابرێت و لانەبراوە، مەگەر خۆی دەستبەرداری کارەکەی ببێت.
دەشڵێ، مامۆستایانی گرێبەست ئەوانەی گرێبەستیان نوێ نەکرابێتەوە، بۆیان نوێ دەکرێتەوە و لەکارەکانیان بەردەوام دەبن.
نەژاد عەبدوڵا، بەڕێوەبەری گشتیی پەروەردەی سلێمانیش دەڵێ، "هیچ کێشەیەک لە گرێبەستی مامۆستایان نییە و گرێبەستی گرێبەستی هەموویان نوێ کراوەتەوە و بەردەوام ئەبن لە ئەرکەکانیان."
هاوکات د. توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵای هەرێمی کوردستان ئاماژە بەوەدەکات، "بەشێکی گرێبەستەکانی زانکۆکانی سلێمانی و سەڵاحەدین نوێنەکرابوونەوە، بەڵام کێشەکەیان چارەسەرکراوە و نوێ دەکرێنەوە و هیچ کێشەیەکیان نییە".
لە هەرێمی کوردستان زیاتر لە 60 هەزار مووچەخۆری گرێبەست هەن، کە زۆرینەیان مامۆستایانی گرێبەستی وەزارەتەکانی پەروەردە و خوێندنی باڵان و مووچەیان لەسەر داهاتی ناوخۆی هەرێمی کوردستانە.