لە فێسیڤاڵێکی پڕ لە کێبڕکیدا و لەنێو هەزار و 600 ڕکابەردا لە سەرانسەر ئەڵمانیەوە، چالاکوانێکی کوردی لەدایکبووی قامیشلوی ڕۆژئاوای کوردستان، تاجی شاجوانی ئەڵمانیای 2026ـی بردەوە.
ڕۆز مۆندی، کە ناوی ڕاستەقینەی دوعا فارسە، کچێکی تەمەن 26 ساڵە و بە ڕەچەڵەک کوردە، لە قامیشلۆی رؤژئاوای کوردستان لەدایک بووە، بەڵام لە تەمەنی پێنج ساڵیەوە لەگەڵ خێزانەکەی بەهۆی شەڕەوە کۆچیان بۆ ئەڵمانیا کردووە.
ڕۆز، چالاکوان و گەیمەرێکی بەناوبانگی ئەڵمانیایە، کاریگەرییەکانی لە ڕێگەی ئۆنلاینەوە پێشتر ناسێنراوە، چونکە لە ساڵی 2025دا وەک "ستریمەری ساڵ" هەڵبژێردرا.
لە تۆڕە کۆمەڵایەتییەکانی ئەو وڵاتەوە، لایڤ دەکاتەوە و باس لە کولتوری ئۆنلاین، ڕەگەزپەرستی، ئەزموونەکانی وەک ژنێک لە جیهانی یاریکردندا دەکات.
دوابەدوای هەڵبژاردنی وەک شاجوانی ئەڵمانیا بۆ ساڵی 2026، ڕۆز لە گوتارێکدا گوتی: "دەبوو دوو هێندەی پیاوان زیاتر کاربکەم بۆ ئەوەی بناسرێم.."
باسی لە جیاوازی تێڕوانین لەنێوان ژن و پیاودا کرد، ئاماژەی بەوەشکرد: "کاتێک پیاوێک خۆپەرست دەبێت، پێی دەگوترێت سەرکردە یان سەرۆک یاخود گەورە، بەڵام ئێمەی ژنان بە شەیتانی گەورە وەسف دەکەن!"
لە کۆتای وتارەکەشیدا ڕۆز گوتی: " ئێمە تەنها شەڕ بۆ خەونەکانمان ناکەین، بەڵکو دژی ژنکوژی و بچووککردنەوەی ڕۆڵی ژنانین لە جیهاندا"
پاشان ئامانجی خۆی بۆ ئەم ساڵی شاجوانی ئەڵمانیا دەربڕی و گوتی: "دەمەوێت ببمە خوشکێکی گەورە بۆ هەموو ژنێک کە لە ئێستادا گومانی لە خۆی هەیە".
کچێکی کورد بە شاجوانی ئەڵمانیا بۆ ساڵی 2026 هەڵبژێردرا
