بڕیارە سبەی یەکشەممە، یەکێتیی نیشتمانیی کوردستان و جووڵانەوەی نەوەی نوێ کۆببنەوە و ڕێککەوتنی نێوانیان واژۆ بکەن.
سەرچاوەیەکی تایبەت لە جووڵانەوەی نەوەی نوێ بە میدیای پارتی ڕاگەیاندووە: ڕەشنووسی ڕێککەوتنی نێوان نەوەی نوێ و یەکێتی ئامادە کراوە و وابڕیارە سبەی هەردوولا کۆببنەوە و واژۆی بکەن.
بەگوێرەی ڕێککەوتنەکە، یەکێتی و نەوەی نوێ هاوپەیمانییەکی هاوبەش لە پەرلەمانی کوردستان پێکدەهێنن و لە وەرگرتنی پۆستەکانی حکومەتدا هاوبەشی ڕاستەقینە دەبن و لەمەودوا هەردوو حزب بە تیمێکی هاوبەش بەشداریی کۆبوونەوەکان لەگەڵ لایەنە سیاسییەکانی دیکەدا دەکەن.