ڕاپۆرتی کۆمیسیۆنی یەکڕیزی و نیشتمانی لە پەرلەمانی تورکیا پەسەندکرا، ئۆجالانیش ده‌ڵێ، یەکگرتنی کورد دەبێتە یەکێک لە پایە بنەڕەتییەکانی کۆمار.
ڕاپۆرتەکە بە زۆرینە و 47 دەنگی بەڵی بەرامبەر بە 2 دەنگی نەخێر و یەک دەنگی پوچەڵ پەسەندکرا، بڕیارە ڕەوانەی ئەنجومەنی گەورەی نیشتمانی تورکیا بکرێت.
شاندی ئێمڕاڵی لە ڕاگەیندراوێکدا ناوەڕۆکی کۆبوونەوەی 16 شوباتی 2026 لەگەڵ ڕێبەر ئاپۆ بۆ ڕایگشتی بڵاوکردەوە و ڕایگەیاندووە، ڕێبەر ئاپۆ وتوویەتی، یەکگرتنی کورد دەبێتە یەکێک لە پایە بنەڕەتییەکانی کۆمار، ئەمەش بنیادنانی سەدەی نوێ تەنانەت هەزارەیەکی نوێیە بۆ کورد.
ڕاشیگەیاندووە، ئەو پرۆسەیەی ئێمە لەدوای خۆمان بەجێمانهێشتووە لە بنەڕەتدا توانا و هێزی ئێمەی بۆ دانوستان سەلماندووە، ئەمەش وایکردووە لە سیاسەتی توندوتیژی و دابەشبوونەوە بەرەو سیاسەتی یەکگرتنی دیموکراسی هەنگاو بنێین.
ئاماژەی بەوەشکردووە، ڕاپۆرتی کۆمیسیۆنی پەرلەمانی تورکیا پێویستە لەگەڵ واقیعە کۆمەڵایەتییە بنەڕەتییەکان بگونجێت، ئێستاش قۆناغی کۆتاییهێنان بە سیاسەتی نکۆڵیکردن لە کورد و زمانی کوردییە.
پێشتر نوعمان کورتولموش سه‌رۆكی په‌رله‌مانی توركیا ڕایگەیاندبوو، ئەوان خوازیارن لە مانگی ڕەمەزاندا یاسای نوێ سەبارەت بە پڕۆسەی ئاشتی لە تورکیا دەربکرێت و پڕۆسەکە بە فەرمی چووەتە قۆناغی دووەمه‌وه كه گرتنه‌به‌ری رێكاره یاسایی و كارگێڕییه‌كانه.